राजविराजमा खुलेआम अवैधरुपमा असुरक्षित गर्भपतन गराउँदै, नियमनकारी निकाय मौन 

राजविराज ।  सप्तरीमा निजी स्वास्थ्य केन्द्रहरूले गैरकानुनी ढंगमा खुलेआम असुरक्षित गर्भपतन गराउने गरेको पाइएको छ । नियमनकारी निकायद्वारा नियमित अनुगमन, निगरानी तथा कानुनी कारवाही नहुँदा यो धन्दा फस्टाएको हो  । 

सरकारी अस्पताल र स्वास्थ्य केन्द्रबाहेक शहर देखि ग्रामीण भेगमा पनि निजी अस्पताल, पोलिक्लिनिक, क्लिनिक र औषधि पसलले समेत गर्भपतन कार्य गर्दै आएको पाइएको छ ।  

जिल्लाको अधिकांश क्लिनिक, निजी स्वास्थ्य संस्था एवम् औषधि बिक्रेताले पैसाको लोभमा असुरक्षित गर्भपतन कार्यमा संलग्न भएको पाइएको हो । स्वास्थ्य संस्था तथा औषधि बिक्रेताले गर्भपतन गराउन औषधिको प्रयोग गर्ने गरेको रहस्य पनि खुलेको छ ।

अवैध रूपले सञ्चालित गर्भपतन केन्द्रहरूले नियम र कानूनको ख्यालै नराखी गर्भपतन गराउने भएकाले उनीहरूले त्यसबापतको शुल्क पनि महँगो लिने गर्दछन् । यसरी गर्भपतन गराउँदा सेवाग्राहीहरूको अवस्था हेरेर राजविराजमा केही क्लिनिक र औषधि पसलले  १० देखि २५ हजारसम्म लिने गर्छन, नाम उलेख नगर्ने शर्तमा एक जना औषधि बिक्रेताले बताउँछन । 

यति हुँदाहुँदै पनि यस्ता पोलिक्लिनिक, क्लिनिक, औषधि पसललाई  विस्थापन तथा कारबाही गर्न स्थानीय प्रहरी निकाय र स्वास्थ्य कार्यालय, स्थानीय सरकार समेत उदासिन बन्दा यो व्यापारका रूपमा फस्टाएको स्थानीयवासीहरुको भनाइ छ । 

लुकिछिपी गर्भपतन गराउनेहरूमा अधिकांश मात्रामा अविवाहित युवती र श्रीमान् विदेश गएको अवस्थामा केटाकेटी पढाउन शहरमा डेरा गरी बसेका विवाहित महिला हुन्छन्  । 

गर्भपतन गराउन अनुमति लिनका लागि गर्भपतनसम्बन्धी डाक्टरले १२ हप्ता र नर्सले आठ हप्ताको तालीम लिनुपर्ने प्रावधान छ तर जिल्लाका निजी क्लिनिक, स्वास्थ्य संस्था एवम् औषधि पसलेले आर्थिक लोभका लागि गैरकानूनी तवरले असुरक्षित गर्भपतन गराउने गरेको पाइएको छ ।

नियमनकारी निकायद्वारा नियमित अनुगमन र कारवाही नभएपछि जिल्लाका औषधि पसलहरूमा समेत गर्भपतनका असुरक्षित औषधिको बिक्री वितरण बढ्दो छ भने औषधि पसल चलाउन नपाउने स्वास्थ्यकर्मीहरूले अर्काको नाममा औषधि पसल दर्ता गरेर खुलेआम रुपमा औषधि उपचार गरिरहेका छन् ।

यता सप्तरी प्रहरी प्रमुख ढकेन्द्र खतिवडाले खुलेयाम असुरक्षित गर्भपतन गराउने हल्ला सम्बन्धमा सिभिल प्रहरी खटाएर छानबिन गरिरहेकाे छु, फेला परेमा कानुन बमोजिम कार्यवाही गर्न बताए ।

यस सम्बन्धमा राजबिराज नगरपालिका स्वास्थ्य संयाेजक निरन्जन कुमार यादबले असुरक्षित गर्भपतन गराएको फेला परेमा कानुनी बमोजिम कार्यवाही गरिने बताए ।
सुरक्षित गर्भपतन गराउन सम्बन्धित स्वास्थ्य संस्था र सुचिकृत कर्मचारी बाहेक अन्य कसैले त्यस्ता गतिविधि गरेको खण्डमा कार्यवाही गर्ने संयाेजक यादबकाे भनाई छ ।