हनुमाननगर कंकालनीमा अनुमति बिना दर्जनौँ विद्यालय सञ्चालित

राजबिराज । हनुमाननगर कंकालनी नगरपालिकाका आधा दर्जन भन्दा बढी विद्यालय अनुमति बिना नै संचालन गरेको पाइएको छ ।

आइतबार शिक्षा विकास तथा समन्वय इकाई कार्यालयको अगुवाईमा तथा  नगरको सरोकारवाला निकायबाट नगरको बजार क्षेत्रका संस्थागत विद्यालयको अनुगमन गर्दा अनुमति बिना बिधालय संचालन गरेको बिधालयहरू पाइएको हो ।

नगरको शिक्षादीप बोडिंग स्कुलले दुई कक्षा सम्मको अनुमति लिएर कक्षा ५ सम्मको कक्षा संचालन गरेको छ ।

यसैगरी गौतम बुद्ध आइडियल स्कुलले कक्षा ५ सम्म अनुमति बिना कक्षा संचालन गरेको छ, ग्रीन ल्यान्ड एकेडेमी कक्षा १ को अनुमति लिई कक्षा ४ सम्म कक्षा संचालन गर्दै आएको छ ।

त्यस्तै आन्नद प्राइभेट एजुकेसनल गुढीले कक्षा १ को अनुमति लिई कक्षा ८ सम्मको पठनपाठन गर्दै छ । नगरकै आरपी मेमोरियल स्कुलले कक्षा १ को अनुमति लिई कक्षा ७ सम्म कक्षा संचालन गर्दै आएको  छ भने ब्राइट फ्युचर एकेडेमीले अनुमति बिना कक्षा ३ सम्मको कक्षा संचालन गर्दै आएको अनुगमन टोलीका सदस्य सत्य नारायण दासले जानकारी दिए ।

यता अनुगमन टोलीका सदस्य तथा शिक्षा विकास तथा समन्वय इकाईका शाखा अधिकृत कमलनाथ यादबले अनुमति लिएर मात्र बिधालय संचालन गर्न निर्देशन दिएको छ ।

विद्यालयमा थप कक्षा संचालन गर्न सम्बन्धी नगरपालिकाबाट अनुमति लिएर मात्र विद्यालय गर्न निर्देशन दिइदै शाखा अधिकृत यादबले भने दोस्रो पटकको अनुगमन गर्ने क्रममा अनुमति लिएर कक्षा संचालन नगरेमा कानुनी बमोजिम  कार्यवाही गर्ने चेतावनी दिएको छ ।

अनुगमन टोलीमा हनुमाननगर कंकालनी नगरपालिका शिक्षा शाखा प्रमुख तथा शिक्षा अधिकृत हरि नारायण साह, जिल्ला प्रशासन कार्यालयका खरिदार शिव नाथ मण्डल लगायतको सहभागिता रहेको थियो ।