पत्रकार मण्डललाई सामाजिक सञ्जालमा धम्की, न्याय नपाए संघर्षको चेतावनी

राजविराज । प्रेस स्वतन्त्रताको संरक्षणका लागि संघर्षरत पत्रकारहरू सामाजिक सञ्जालमार्फत बढ्दो अपमान र धम्कीको सिकार बन्दै गएका छन् ।

पछिल्लो घटना क्रममा पत्रकार कृष्ण कुमार मण्डलमाथि गरिएको अपमानजनक अभिव्यक्ति र धम्कीले पत्रकारिता पेसामाथिको जोखिमलाई पुनः उजागर गरेको छ ।

नेपाल पत्रकार महासंघ शाखा सप्तरीका कार्यवाहक सचिव समेत रहेका मण्डललाई सन्तोष कुमार चमनले सामाजिक सञ्जालमार्फत सार्वजनिक रूपमा गालीगलौज गर्दै पत्रकारिता क्षेत्रकै बदनाम हुने गरि पत्रकार मण्डलको चरित्र हत्या गर्ने प्रयास गरेका छन् ।

फोनिज मधेस प्रदेश र प्रेस चौतारी नेपाल सप्तरीले  विज्ञप्ति जारी गर्दै उक्त घटनाप्रति गम्भीर ध्यानाकर्षण भएको जनाएका छन् । उनीहरूले चमनद्वारा समाजकी संजालमा प्रयोग गरिएका विभिन्न किसिमका अपमानजनक शब्दहरूलाई केवल व्यक्तिगत दुश्मनीको रूपमा नभई सम्पूर्ण पत्रकार समुदायमाथिको अनादर र प्रेस स्वतन्त्रतामाथिको सीधा आक्रमणको रूपमा लिएको उल्लेख गरेका छन् ।

विज्ञप्तिमा भनिएको छ, चमनद्वारा गरिएको चरित्र हत्या र अभद्र व्यवहार भ्रष्टाचारको संरक्षण गर्न र सत्य लेख्ने पत्रकारलाई दमन गर्ने नियतबाट प्रेरित छ ।  दुर्व्यवहारपूर्ण आपत्तिजनक शब्द प्रयोग गरि चरीत्र हत्यामा संलग्न व्यक्तिलाई  कडा कारबाहीका लागि  पहल लिन सरोकारवाला निकायहरुलाई आग्रह गर्दै प्रेस विज्ञप्तिमा पत्रकार मण्डलले न्याय नपाए संघर्षमा उत्रिने चेतावनी समेत दिइएको छ ।