तीन पुस्तादेखि भोगचलनमा रहेको मोही जग्गा नक्कली कागजातमार्फत हडप्ने प्रयास

राजविराज । सप्तरीको हनुमाननगर कंकालिनी नगरपालिका-१ निवासी बालकृष्ण खड्गाले आफ्नो तीन पुस्तादेखिको मोही दर्ता रहेको जग्गा नक्कली कागजात तयार गरी हडप्न खोजिएको आरोप लगाएका छन् ।

राजविराजमा मंगलबार नेपाल पत्रकार महासंघमा आयोजना गरिएको पत्रकार सम्मेलनमा खड्गाले तत्कालीन वडा सचिव महेन्द्र मुखियाको मिलोमतोमा स्थानीय लाल मोहन झा, अरविन्द झा, विनिता कुमारी झा लगायतको समूहले जग्गा हडप्न खोजेको आरोप लगाए ।

उनका अनुसार हजुरबुबा जगु खड्गादेखि नै भोगचलन हुँदै आएको १२ कठ्ठा १८ धुर जग्गा उनका पिता रामस्वरुप खड्गाले २००४ सालमा मोही दर्ता गराएका थिए । हाल उक्त जग्गा देवेन्द्र कायस्थ र छोरा सोभालाल कायस्थको नाममा कृते कागजात खडा गरी झा परिवारको नाममा नामसारी गरिएको हो ।

खड्गाले दावी गरे अनुसार, वडा सचिव महेन्द्र मुखियाले यो कार्यमा मुख्य भूमिका खेलेका छन् । उनले भने, “वडामा कहिल्यै काम नगरेका मटर साह हलुवाईलाई कार्यालय सहयोगीको दर्जा दिई नक्कली दस्तावेज तयार गरिएको छ।”

हलुवाई मटर साहले पनि पत्रकार सम्मेलनमै आफू सरकारी कर्मचारी नभएको स्पष्ट पारे। उनले लामो समयदेखि चटपटीको ठेला चलाउँदै आएको बताउँदै, “कुनै पनि सम्बन्ध नभएको कार्यालयको कर्मचारी बनाइएको छ,” भने ।

हलुवाईले झा परिवारका सदस्य ज्योती झाबाट कर्मचारी भएको भनी पुष्टि गराउन दबाव आएको पनि बताए । उनले आफ्नो दस्तखत दुरुपयोग गरी बदनाम गर्नेहरुलाई कारबाहीको माग गरे ।

खड्गाले आफ्नो मोही दर्ता खारेज गर्ने भूमिसुधार कार्यालय सप्तरीको निर्णयप्रति आपत्ति जनाए । भूमिसुधार कार्यालय प्रमुख लक्ष्मीप्रसाद खरेललाई प्रमाणसहित जानकारी दिँदासमेत सुनुवाइ नभएको उनको गुनासो छ ।

भूमिसुधार कार्यालयका सुब्बा रामनारायण भिन्दावारले विपक्षीको पक्षमा निर्णय सुनाएको भन्दै खड्गाले गहिरो दुःख व्यक्त गरे । उनले नक्कली कागजात बनाउने र त्यसका आधारमा निर्णय गर्नेहरूमाथि छानबिन गरी कारबाहीको माग गरे ।