राजबिराजमा गणतन्त्र दिवसमा कोण सभा : तीन तहकै सरकार जिम्मेवार बन्नुपर्नेमा जोड

राजबिराज । गणतन्त्रलाई संस्थागत गर्न तिनै तहकै सरकार जिम्मेवार बन्नुपर्नेमा सहभागीहरूले जोड दिएका छन । बिहीवार जिल्ला समन्वय समिति सप्तरीले  १८ औं गणतन्त्र दिवसको अवसरमा आयोजित कोण सभामा वक्ताहरूले सो कुरा बताएको हो । 

 जिल्ला समन्वय समितिका प्रमुख शिव नारायण साहको अगुवाईमा निकालिएको रेली नगरको विभिन्न ठाउको परिक्रमामा गरी गजेन्द्र चौकमा कोण सभामा परिणत भएको थियो । कोण सभामा रूपनी गाउपालिका अध्यक्ष दिनेश कुमार यादबले गणतन्त्र संस्थागत गर्न र  अधिकार प्राप्तिको लडाइँ भइरहेको बताए । उनले केन्द्र सरकारले प्रदेश र स्थानीय सरकारलाई तोके अनुसारको अधिकार दिन नसकेको भन्दै प्रदेश सरकारमा पूर्ण अधिकार नआउँदासम्ममा गणतन्त्र संस्थागतमा चुनौति थपिइरहेको बताए । 

राजबिराज नगरपालिका कावा नगरप्रमुख ईसरत परविनले गणतन्त्रको उपलब्धीलाई तल्लो तहसम्म पुर्‍याए मात्र गणतन्त्रमा सबैको अपनत्व बढ्ने बताइन । जसपा नेपाल सप्तरीका अध्यक्ष केदार यादबले उनले कुनै न कुनै अधिकार दिन कन्जुस्याइँ गरेको जसले गर्दा गणतन्त्र संस्थागत हुन चुनौती थपिएको बताए ।

कोण सभामा युवा नेता गजेन्द्र मण्डलले अहिले पनि तहगत रुपमा संविधानले तोकेको अधिकारहरू प्राप्त हुन नसकेको भन्दै गणतन्त्र संस्थागत हुन नसक्ने र ,जनताको अपेक्षा पूरा गर्न नसकिने, आ–आफ्नो दायित्व पूरा गर्न नसक्ने जस्ता समस्या देखिएका छन्, उनले भने ।

मजदुर नेता केदार देवले संघीय लोकतान्त्रिक गणतन्त्रलाई संस्थागत गर्न तीन तहकै सरकार जिम्मेवार बन्नु पर्ने बताए । अधिकार बाँडफाँडमा केन्द्र सरकारले हस्तक्षेप गर्न नहुने उनको भनाइ छ । उनले भने गणतन्त्र चन्दा चिठ्ठा र दानमा प्राप्त नभएको भन्दै यसको महत्व ठूलो रहेको बताए ।

जिल्ला समन्वय समितिका प्रमुख शिव नारायण साहको अध्यक्षतामा आयोजित कोणमा प्रमुख जिल्ला अधिकारी भोला दहाल, सप्तरी प्रहरी प्रमुख ढकेन्द्र खतिवडा, सशस्त्र प्रहरी उपरीक्षक ज्ञानमणि पौडेल, नेपाल पत्रकार महासँघ सप्तरी अध्यक्ष श्रवण देव, नागरिक समाजका अध्यक्ष थानसिंह भन्साली, विभिन्न सरकारी कार्यालयका प्रमुख, राजबिराज नगरपालिका प्रमुख, विभिन्न बिधालयका छात्रछात्रा सहित सुरक्षा निकायहरूको सहभागिता रहेको थियो ।