चन्दन यादब 
राजविराज । किसानहरूलाई बलान बिहुल गाउँपालिकाले सिँचाइको बिल तिरेपछि किसान उत्साहित भएका छन ।
गाउँपालिकाले कृषिमा प्रयोग हुने सिँचाइ मिटरको विद्युत महसुल अब आफैं भुक्तानी गर्ने निर्णय गरेपछि स्थानीय कृषकहरू उत्साहित भएका छन् ।
गाउँपालिका अध्यक्ष खेमचन्द्र यादवका अनुसार सिँचाइको पहुँच बढाउन र किसानलाई आत्मनिर्भर बनाउन यो कार्यक्रम ल्याइएको हो । “यसै आर्थिक वर्षमा खेतसम्म पानी पुर्याउन करिब १ करोड रुपैयाँको लागतमा कृषि विद्युतीकरण सुरु गरिएको छ,” उनले भने ।
उनका अनुसार पालिकाले कृषकलाई लक्षित गर्दै डिप बोरिङ वितरण, बीउबिजनमा अनुदान, रोगकीराको नियन्त्रणका लागि निःशुल्क विषादी वितरण, र कृषिमा परामर्शका लागि प्राविधिकमार्फत खेतमै सेवा दिने कार्यसमेत अघि बढाएको छ ।
यस्ता कार्यक्रमले कृषिमा आधुनिकीकारण र उत्पादन वृद्धिमा टेवा पुर्याउने गाउँपालिकाको विश्वास छ । गाउँपालिकाको ११औं गाउँसभाले आर्थिक वर्ष २०८१र८२ का लागि ‘कृषि मिटरको विद्युत महशुल कार्यक्रम’ लागू गर्ने निर्णय गरेको हो ।
योजना अनुसार २०८१ साउन महिनादेखिको विद्युत बिल गाउँपालिकाले तिर्नेछ। यद्यपि, त्यसअघिको बक्यौता २०८१ असार मसान्तसम्मको बिल भने किसानले आफैं भुक्तानी गर्नुपर्नेछ ।
कृषक श्याम यादव भन्छन्, “गाउँपालिकाले विद्युत महसुल तिर्दिने योजना जनमुखी छ । यस्तो कार्यक्रमले कृषकमा उत्साह थपेको छ ।”
गाउँपालिकाले २०८२ जेठ १६ गते सार्वजनिक सूचना जारी गर्दै किसानहरूलाई आवश्यक कागजातहरू कृषि विकास शाखामा बुझाउन आग्रह गरेको छ । आवेदन दिँदा नागरिकताको प्रतिलिपि, २०८१ असारसम्म तिरेको सक्कलै बिजुली बिल, त्यसपछि भुक्तानी हुन बाँकी बिल, चालु आर्थिक वर्षको मालपोत रसिदको प्रतिलिपि समेत अनिवार्य गरिएको छ। यी सबै कागजात जेठ मसान्तभित्र बुझाउनु पर्नेछ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |