चन्दन यादब 
राजविराज । राजविराज नगरपालिकामा हाल निलम्बित नगरप्रमुख भीमराज यादव र कार्यवाहक नगरप्रमुख इसरत परविनबीचको विवाद चुलिंदै जाँदा स्थिति नियन्त्रणबाहिर गएको छ ।
आन्तरिक सत्ता संघर्षले गर्दा नगरपालिकाको सेवा प्रवाह ठप्प भएको छ भने नगरपालिका भवनमा तोडफोड र झडपको अवस्था सिर्जना भएको छ ।
निलम्बित मेयर यादवले प्रमुख प्रशासकीय अधिकृत डा. श्रवण कुमार साहको सरुवापछि आइतबार नगरपालिकाको कार्यालयमा ताला लगाएका थिए । साहको स्थानमा शिक्षा शाखा प्रमुख भोगेन्द्र यादवलाई निमित्त प्रमुख प्रशासकीय अधिकृत बनाइएको थियो। यादवले उक्त नियुक्तिलाई अस्वीकार गर्दै नियुक्तिलाई भ्रष्टाचार ढाकछोप गर्न गरिएको भन्दै विरोध जनाए ।
मंगलबार बिहान कार्यवाहक मेयर इसरत परविन नेतृत्वको समूहले कार्यालयमा लगाइएको ताला तोडेर भोगेन्द्र यादवलाई हाजिर गराएपछि स्थिति तनावपूर्ण बन्यो । त्यसपछि निलम्बित मेयर यादव समर्थकहरूले आक्रोश व्यक्त गर्दै नाराबाजी र तोडफोड गरेका थिए ।
उक्त झडपमा कार्यालय भवनका झ्यालका सिसा, बारुण यन्त्र कर्मचारी बस्ने भवन, मोटरसाइकल, तथा मेयरको सरकारी गाडीमा तोडफोड गरिएको छ । लेखापाल शत्रुघ्नलाल दासमाथि निर्घात कुटपिट गरिएको छ भने वडा नं. ९ का अध्यक्ष जवाहिर यादव घाइते भएका छन् । उनको हातमा चोट लागेको बताइएको छ । यसैगरी स्वास्थ्यकर्मी सन्तोष दासमाथि पनि हातपात भएको छ ।
ताला तोडेर नयाँ हाकिमलाई हाजिर गराउन मेयर परविन नेतृत्वको टोली माथिल्लो तलामा पुगेपछि यादव समर्थकहरूले तल्लो तलामा टायर बालेर प्रदर्शन गरेका थिए । स्थिति नियन्त्रणमा लिन नेपाल प्रहरी र सशस्त्र प्रहरी बल परिचालन गरिएको थियो ।
प्रमुख प्रशासकीय अधिकृत डा. श्रवण कुमार साह आर्थिक अनुशासनमा कडाइ गर्दै आएका थिए। उनले प्रक्रियागत कमजोरी रहेका योजना फाइलहरू रोकेका थिए जसले भुक्तानी प्रक्रियामा अवरोध सिर्जना गरेको थियो। एक हप्ताअघि झण्डै १० लाख रुपैयाँ राजस्व हिनामिनाको प्रकरण सार्वजनिक भएपछि साहले राजस्व शाखा प्रमुख कल्पना देवलाई तीन दिनभित्र रकम बैंकमा दाखिला गर्न निर्देशन दिएका थिए।
यही सन्दर्भमा भोगेन्द्र यादवको नियुक्ति भएपछि विवाद झनै चर्किएको हो। निलम्बित मेयर यादव उक्त नियुक्ति भ्रष्टाचारलाई बचाउन गरिएको भन्दै आक्रोशित छन्। उनी कावा मेयर परविनमाथि “एकलौटी ढंगले” नगरपालिका सञ्चालन गरेको आरोप लगाउँछन्।
यसबिच, विवादका कारण सामान्य प्रशासन, बजेट कार्यान्वयन, योजना स्वीकृति, र दैनिक जनसेवामा ठप्प भएको छ । नगरवासीहरू दैनिक कामकाजका लागि नगरपालिका पुग्दा निराश भएका छन् ।
कार्यवाहक मेयर इसरत परविनले भने, “हामीले वार्तामार्फत समाधान खोज्ने प्रयास गर्यौं, तर निलम्बित मेयर यादव नमानेपछि जनताको सहयोगमा ताला खोलेर नयाँ हाकिमलाई हाजिरी गराएका हौं ।”
उनले नगरको विकास र सुशासनका लागि सबै पक्षसँग सहकार्य आवश्यक रहेको बताउँदै निलम्बित मेयरसहित सबै नगरवासीलाई सहयोगको अपिल गरेकी छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |