सप्तरीको मलेठमा आगलागी, दुई लाख ५० हजार बराबरको क्षति

राजविराज । सप्तरीको राजविराज नगरपालिका–९ स्थित मलेठमा बिहीबार बिहान आगलागी हुँदा करीब दुई लाख ५० हजार रुपैयाँ बराबरको धनमाल जलेर नष्ट भएको छ ।

स्थानीय पुलकित खंगको घरमा बिहान करिब १० बजे आगलागी भएको हो । खाना पकाउने क्रममा चुलोबाट अचानक आगो सल्किएर आगलागी भएको जिल्ला प्रहरी कार्यालय सप्तरीका प्रवक्ता एवं प्रहरी नायब उपरीक्षक जितेन्द्र कुमार बस्नेतले जानकारी दिए ।

आगलागीका कारण तीनवटा घरसहित घरभित्र रहेको अन्नपात, लत्ताकपडा, भाँडावर्तन, नगद ४० हजार रुपैयाँ र काठ जलेर पूर्ण रूपमा नष्ट भएको प्रहरीले जनाएको छ । उक्त क्षतिको कुल मूल्य करीब दुई लाख ५० हजार रुपैयाँ अनुमान गरिएको छ ।

प्रहरी उपरीक्षक गौतम कुमार केसीको नेतृत्वमा खटिएको नेपाल प्रहरीको टोली, स्थानीय बासिन्दा र दमकलको सहकार्यमा आगो पूर्ण रूपमा नियन्त्रणमा ल्याइएको जिल्ला प्रहरी कार्यालय सप्तरीले जनाएको छ ।