तिरहुत टाइगर्सलाई सप्तरी प्राइड लिगको उपाधि

राजविराज । तिरहुत टाइगर्सले लगातार दोस्रो पटक मेयर कप सप्तरी प्राइड लिगको उपाधि जित्न सफल भएको छ। बिहीबार सम्पन्न सातौँ संस्करणको फाइनलमा टाइगर्सले राजविराज राजदेवी रोयललाई ९ विकेटले पराजित गर्दै उपाधि आफ्नो पोल्टामा पार्‍यो ।

राजविराजस्थित पब्लिक विन्देश्वरी स्कुल मैदानमा भएको खेलमा टाइगर्सले ९३ रनको सामान्य लक्ष्य १५.३ ओभरमै १ विकेटको क्षतिमा पूरा गर्‍यो। ओपनर भोला शाहले अविजित अर्धशतक प्रहार गर्दै जितमा अहम भूमिका खेले। उनले ४५ बलमा ५ चौका र ३ छक्काको मद्दतमा नटआउट ५६ रन बनाए। भोलाले दोस्रो विकेटका लागि निरज यादवसँग अविजित ७९ रनको साझेदारी गरे। निरजले १८ रन बनाए भने अभिनाश कर्णले १३ रनको योगदान दिए । रोयलका नितेश यादवले एक मात्र विकेट लिए ।

यसअघि टस जितेर पहिला ब्याटिङ गरेको राजविराज राजदेवी रोयलले २० ओभरमा ९२ रनमै सीमित रह्यो। रोहन विकले २३ रन बनाउँदै टिमका सर्वाधिक रन बनाउने खेलाडी भए। अभिषेक तिवारीले १९ र जितु यादवले अविजित १८ रन बनाए। बाँकी ब्याट्सम्यान भने दोहोरो अंकमा पुग्न असफल भए ।

टाइगर्सका बलरहरू प्रभावशाली रहे। श्रवण यादवले ४ ओभरमा ३२ रन खर्चिँदै ३ विकेट लिए। चित्र बहादुर बिष्ट र अनिल यादवले २/२ विकेट लिए भने राहुल मण्डल र अजय यादवले समान १/१ विकेट झारे ।

सप्तरी क्रिकेट संघद्वारा आयोजित प्रतियोगितामा विजेता बनेको टाइगर्सले नगद २ लाख रुपैयाँ प्राप्त गर्‍यो भने उपविजेता राजदेवी रोयलले १ लाख रुपैयाँमा चित्त बुझायो ।

प्रतियोगिताको ‘प्लेयर अफ द टुर्नामेन्ट’ राजदेवी रोयलका दिवान पुन घोषित भए। उनले ४ खेलमा १०१ रन र ६ विकेट लिँदै २५ हजार रुपैयाँ प्राप्त गरे ।

उत्कृष्ट ब्याट्सम्यान टाइगर्सका भोला शाह घोषित भए, जसले ४ खेलमा १३८ रन बनाए। उत्कृष्ट बलर टाइगर्सकै चित्र बहादुर बिष्ट भए, जसले ४ खेलमा १३ विकेट लिए। दुवैले १५/१५ हजार रुपैयाँ पुरस्कार पाए । उदयमान खेलाडीको रूपमा टाइगर्सका अनिल यादव सम्मानित भए ।

समापन समारोहमा राजविराज नगरप्रमुख ईसरत परविन, तिरहुत गाउँपालिका अध्यक्ष विजय यादव, प्रमुख जिल्ला अधिकारी भोला दहाल, सशस्त्र प्रहरी उपरीक्षक ज्ञानमणि पौडेल, राष्ट्रिय अनुसन्धान उपनिर्देशक कुलचन्द्र नेपाल, सप्तरी क्रिकेट संघ अध्यक्ष आयुष श्रेष्ठ, अन्तर्राष्ट्रिय खेलाडी महबुब आलम, आईसीसी प्यानल अम्पायर वृद्धि बहादुर प्रधान, संघ उपाध्यक्ष निरज सिंह, प्रतियोगिता संयोजक डम्बर नारायण दास लगायतको उपस्थितिमा विजेता तथा उपविजेता टिमलाई शिल्ड, ट्रफी र प्रमाणपत्र प्रदान गरियो ।

८ दिनसम्म सञ्चालन भएको प्रतियोगितामा सप्तरी जिल्लाका ८ टिम सहभागी थिए ।