गजेन्द्र नारायण सिंह अस्पतालका चिकित्सकहरू सरकारी समयमै निजी क्लिनिकमा व्यस्त

राजविराज । राजविराजस्थित गजेन्द्र नारायण सिंह अस्पतालमा कार्यरत अधिकांश सरकारी चिकित्सकहरू सरकारी सेवा अन्तर्गत तोकिएको समय अवधिमा अस्पतालमा नबस्ने र निजी क्लिनिकहरूमा सेवा दिइरहेको पाइएको छ ।

मेमाे खबर अनलाइनको टिमले सोमबार अस्पतालको ओपीडी पुगेको बेला अधिकांश चिकित्सकहरू ओपीडीमा उपस्थित नभई निजी क्लिनिकमा बिरामी जाँच गरिरहेको प्रमाण फेला परेको हो ।

यसरी सरकारी अस्पतालको समयमै निजी सेवा दिने चिकित्सकप्रति अस्पताल प्रशासन भने गम्भीर देखिएको छैन । अस्पतालका मेडिकल सुपरिन्टेन्डेन्ट (मे.सु.) डा. प्रकाश प्रसाद साहले यस्तो कार्य दोहोरिएमा कडा कारबाही गर्ने चेतावनी दिए पनि प्रभावकारी कार्यान्वयन भने देखिएको छैन ।

राजविराज वडा नम्बर ११ का रामनरेश यादवले यस्तो प्रवृत्तिलाई नियन्त्रण गर्न कडा कारबाहीको माग गरेका छन् । “एक जना डाक्टरले १ घण्टामै ३० देखि ४० जना बिरामी चेक गर्छन्, त्यसपछि निजी क्लिनिकतिर लाग्छन् । बिरामीले जाँच गराउँदा डाक्टर नै भेटिंदैन,” उनले गुनासो गरे ।

सरकारी अस्पतालले दिउँसो १ बजेदेखि २ बजेसम्म डाक्टरलाई नास्ताका लागि ब्रेक समय दिएको भए पनि धेरै चिकित्सकहरू उक्त समयलाई निजी क्लिनिकमा काम गर्न प्रयोग गरिरहेको पाइएको छ । यतिमात्र होइन, अस्पताल बाट विदा लिएर केही चिकित्सकहरू निजी अस्पताल तथा क्लिनिकमा सेवा दिइरहेको स्थानीयको भनाइ छ ।

नेपाल स्वास्थ्य सेवा ऐन, २०५३ र स्वास्थ्य सेवा नियमावली, २०५५ अनुसार, सरकारी चिकित्सकहरू नेपाल सरकारको पूर्ण अधीनमा रहने प्रावधान छ । बिदा लिने अधिकार भए पनि सो बिदा सरकारले तोकेको उद्देश्य अनुरूप मात्र प्रयोग गर्नुपर्ने कानूनी व्यवस्था छ ।

सार्वजनिक स्वास्थ्य सेवालाई असर पार्ने गरी गरिने यस्ता गैरजिम्मेवार व्यवहार नियन्त्रण गर्न सम्बन्धित निकायहरूलाई तत्काल ध्यान दिन आवश्यक देखिन्छ। सेवा पाउने नागरिकको स्वास्थ्य सुरक्षामा यस्तो लापरवाही सह्य हुन सक्दैन ।