पत्रकारिता सुधारका लागि सुझाव संकलनमा जुट्यो मेडिया काउन्सिल

राजविराज । मधेश प्रदेश सरकारअन्तर्गत सञ्चालित मेडिया काउन्सिलका कार्यवाहक अध्यक्ष सुरेश कुमार यादवले पत्रकारिता पेशालाई मर्यादित, व्यावसायिक र विश्वासिलो बनाउनुपर्नेमा जोड दिएका छन् ।

सोमबार नेपाल पत्रकार महासंघ शाखा सप्तरीको सभाहलमा आयोजित पत्रकार भेटघाट तथा सुझाव संकलन कार्यक्रममा उनले भने, “पत्रकारिता पेसामा टिकाउन पत्रकारको क्षमता अभिवृद्धि गर्न आवश्यक छ । मेडिया काउन्सिलले यस कार्यमा सक्रियरूपमा भूमिका खेल्नेछ ।”

उनले संचारकर्मीहरूले दिएको सुझावको कदर गर्दै मेडियामैत्री बजेटअनुसार वार्षिक कार्यक्रम बनाई अगाडि बढ्ने प्रतिबद्धता व्यक्त गरे । साथै, पत्रकारिताको धर्म आत्मसात् गर्दै जिम्मेवार पत्रकारिता गर्नुपर्नेमा पनि जोड दिए ।

कावाध्यक्ष यादवले वरिष्ठ पत्रकारको सम्मानका लागि पत्रकार कल्याण कोष स्थापना गरिने जानकारी पनि दिए । उक्त कोष यसै वर्षदेखि सञ्चालनमा ल्याउने योजना रहेको उल्लेख गर्दै उनले नीति निर्माणमार्फत पत्रकारितामा देखिएको विकृति हटाउने प्रयास भइरहेको बताए ।

उनका अनुसार मधेश प्रदेशमा हालसम्म ६२ वटा अनलाइन मिडिया दर्ता भएका छन् । ती मिडियालाई वर्गीकरण गरी लोककल्याणकारी विज्ञापनमा जोड्ने कार्यविधि तयार पारिनेछ ।

कार्यक्रममा मेडिया काउन्सिल सदस्य रिंकु मिश्रले पत्रकारिता आचारसंहिताको उल्लंघन बढ्दो क्रममा रहेको भन्दै त्यसलाई नियमन तथा नियन्त्रण गर्न प्रभावकारी कार्यक्रम सञ्चालन गरिने बताइन् ।

नेपाल पत्रकार महासंघ केन्द्रीय सदस्य ललिता साहले काउन्सिलले सम्पूर्ण पत्रकार, पत्रिका तथा पत्रकारिता क्षेत्रको विकासमा गहिरो भूमिका खेल्नुपर्ने सुझाव दिइन् ।

पूर्व सञ्चार प्राधिकरण अध्यक्ष श्यामसुन्दर यादवले प्रदेश सरकारले संचार ऐन संशोधन गरी सञ्चार क्षेत्रलाई स्वायत्त बनाउनुपर्ने र बजेट सम्मानजनक ढंगले छुट्याउनुपर्ने धारणा राखे। उनले भने, “अधिकार प्राप्तिका आन्दोलनमा पत्रकारको ठूलो भूमिका भए पनि प्रदेश सरकार पत्रकारको हकहितप्रति उदासीन छ ।”

नेपाल पत्रकार महासंघ सप्तरीका पूर्व अध्यक्ष वैद्यनाथ झाले पत्रकारिता मर्यादित र व्यावसायिक बनाउन निष्पक्षताको आवश्यकता रहेको बताए । युट्युब पत्रकारिताको नाममा भइरहेको छाडापन नियन्त्रण गर्न काउन्सिल अझ सक्रिय हुनुपर्नेमा उनले जोड दिए ।

त्यसैगरी अर्का पूर्व अध्यक्ष धिरेन्द्र प्रसाद साहले संचारमैत्री बजेट नदेखिएको गुनासो गर्दै पत्रकार र पत्रिकालाई जोगाउन तथा विकास गर्न लोककल्याणकारी विज्ञापनमा वृद्धि गर्नुपर्ने सुझाव दिए । साथै, पत्रकार कल्याण कोषको व्यवस्थित व्यवस्थापन आवश्यक रहेको धारणा राखे ।

महासंघ शाखा सप्तरीका अध्यक्ष श्रवण देवले अनियमित तथा अमर्यादित पत्रकारितालाई नियन्त्रण गर्न र गैरजिम्मेवार मिडियालाई कानुनी दायरामा ल्याउनुपर्ने बताए ।

उपाध्यक्ष सुधा देवले पत्रकारको संख्यामा वृद्धि भए पनि गुणस्तरीय विकास नदेखिएको उल्लेख गर्दै क्षमता अभिवृद्धि अपरिहार्य रहेको भनाइ राखिन् ।

पत्रकार मनोज माझीले पत्रकार आचारसंहिता उल्लंघन सम्बन्धी घटनामा काउन्सिलले निगरानी र नियन्त्रणको भूमिका प्रभावकारी बनाउनुपर्नेमा जोड दिए । युट्युब पत्रकारिताको नाममा भइरहेको विकृति हटाउन काउन्सिलले ठोस कदम चाल्नुपर्ने उनले बताए ।

कार्यक्रममा पत्रकार महासंघ अध्यक्ष श्रवण देव, काउन्सिल सदस्य मनु पासवान, सञ्चार प्राधिकरण सदस्य एवं शाखा कोषाध्यक्ष नवीन गुप्ता, वरिष्ठ पत्रकार गणेश लाल देव, नर्मदेव यादव, अरुण तिवारी, दिनानाथ यादव, बिन्दु यादवलगायतले आ–आफ्ना धारणा तथा सुझाव प्रस्तुत गरेका थिए ।