कमलपुरमा प्रहरी–तस्करबीच गोली हानाहान, एकको मृत्यु

राजविराज । सप्तरीको राजगढ गाउँपालिका–२ स्थित कमलपुरमा मंगलवार राति तस्कर र प्रहरीबीच गोली हानाहान भएको छ ।

मदिरा तस्करी नियन्त्रणका लागि पुगेको प्रहरी टोलीमाथि तस्कर समूहले ढुङ्गामुढा र गोली प्रहार गरेपछि प्रहरीले जवाफी कारबाहीस्वरूप गोली फायर गरेको हो ।

घटनामा प्रहरीले चलाएको गोली लागेर एक जना घाइते भएका थिए । उनलाई उपचारका लागि गजेन्द्रनारायण सिंह अस्पताल लगिएकोमा उपचारकै क्रममा मृत्यु भएको प्रहरी स्रोतले जनाएको छ । मृतकको ठेगाना खुल्न बाँकी रहेको जनाइएको छ ।

झडपका क्रममा एक प्रहरी जवानसमेत घाइते भएको प्रत्यक्षदर्शीहरूले बताएका छन् । घटनापछि थप सुरक्षाकर्मी परिचालन गरिएको छ भने प्रहरीले तस्करीका लागि संकलन गरिएको ठूलो परिमाणको मदिरा समेत बरामद गरेको छ ।

स्थानीयवासीका अनुसार पछिल्लो समय कमलपुर क्षेत्र मदिरा तस्करीको मुख्य केन्द्रको रूपमा सक्रिय बन्दै गएको छ । यस क्षेत्रबाट नियमित रूपमा सीमापारि मदिरा तस्करी हुने गरेको र नियन्त्रणको प्रयास गर्दा यस्ता झडप हुने गरेको बताइएको छ । प्रहरीले घटनाको थप अनुसन्धान सुरु गरेको छ ।