उद्घाटनपछि पनि राजबिराज बसपार्क सुनसान, मुख्य सडकमा सवारी चाप

राजबिराज । राजबिराज बसपार्क उद्घाटन भएको अढाई महिना बितिसक्दा पनि त्यहाँबाट बस सञ्चालन सुरु हुन सकेको छैन ।

वर्षौँको प्रतीक्षा पछि निर्माण सम्पन्न भई विधिवत् उद्घाटन भए पनि बसपार्क सुनसान छ। हाल राजबिराजको गजेन्द्र चौकसहित मुख्य सडकमै सञ्चालकहरूले यातायातका साधन राखी सञ्चालन गर्दै आएका छन् ।

गत जेठ १५ गते एक समारोहका बीच राजबिराज नगरपालिका प्रमुख ईसरत परविनले वडा नं. २ स्थित बसपार्कको रिबन काटी उद्घाटन गरेकी थिइन्। तर बसपार्कबाट सञ्चालन नहुँदा नगरको मुख्य सडकमा सवारी चाप बढेर बजार क्षेत्र अस्तव्यस्त भएको छ ।

गजेन्द्र नारायण सिंह अस्पताल, नेता चौक, गजेन्द्र चौक हुँदै रूपनी मोडसम्मको सडक खण्डमा सवारी चापका कारण साना–ठूला दुर्घटनाहरू दिनहुँजसो हुने गरेको स्थानीयहरूले बताएका छन् ।

मुख्य सडकमा ढेला, सडक पेटी अतिक्रमण गरी सञ्चालन भएका पसल, छाडा चौपाया, मोटरसाइकल, साइकल, बस लगायतका सवारी साधन एउटै ठाउँमा जम्दा दुर्घटना बढ्ने गरेको छ ।

यस विषयमा नगरप्रमुख ईसरत परविनले बसपार्क सञ्चालनका लागि तयारी भइरहेको बताउँदै, आवश्यक कार्यविधि तयार भएपछि चाँडै बसपार्कबाट बस सञ्चालन सुरु गरिने जनाइन् ।