राजविराजमा सडक पेटी अतिक्रमण बढ्दो, नियमन निकाय मौन

राजविराज । राजविराजमा सडक पेटी अतिक्रमण दिनप्रतिदिन बढ्दै जाँदा सर्वसाधारणले ठूलो सास्ती भोग्नुपरेको छ ।

उच्च अदालत जनकपुर राजविराज इजलासदेखि राम मन्दिरसम्म करिब पाँच सय मिटर क्षेत्रमा सडक पेटी मात्रै नभई सडकसम्म कब्जा गरी फुटपाथ पसल र तरकारी बजार सञ्चालन भएपछि पैदल यात्रु र सवारी साधन दुबैलाई आवतजावतमा कठिनाइ भएको छ ।

हुलाकी सडक अन्तर्गत पर्ने उक्त मार्गमा तरकारी, फलफूल, चिया तथा नास्ता पसलेहरूले सडक र पेटी दुवै अतिक्रमण गरेका छन् । यसले बाटो साँघुरो बनाएर दुर्घटनाको जोखिम समेत बढाएको स्थानीयवासीहरूले बताएका छन् ।

मालपोत कार्यालय आसपासको क्षेत्र त झनै अव्यवस्थित छ । त्यहाँ होटल, फुटपाथ पसल र पार्किङले बाटो रोक्दा बेलुकीपख साना–ठूला दुर्घटनासम्म हुने गरेको स्थानियहरूको गुनासो छ ।

खानेपानी मोडदेखि राम मन्दिरसम्मको सडक क्षेत्रमा प्रशासन, कर, हुलाक, अदालत, वन डिभिजन, मालपोत लगायतका सरकारी कार्यालयहरू रहेका कारण दैनिक सेवाग्राहीको ठूलो भीड लाग्ने गर्दछ । तर, त्यसै बेलामा सडक कब्जा गरेर व्यापार व्यवसाय सञ्चालन हुँदा समस्या दोब्बर बनेको स्थानीय सत्य नारायण चौधरीले बताए ।

कतिपयले भोजभतेरका लागि पण्डाल सडकमै राख्ने, कसैले घर निर्माण सामग्री थुपार्ने जस्ता कारणले बजार क्षेत्र अझ अस्तव्यस्त बनेको उनको भनाइ छ ।

हटियाको अवस्था पनि उस्तै छ । नगरपालिकाले केही समयअघि अतिक्रमण हटाएर बनाएको नाला र सडक पेटी फेरि व्यापारीहरूले कब्जा गर्दा सर्वसाधारणलाई पैदल हिँड्नसमेत कठिनाइ भएको छ ।

यस विषयमा प्रमुख जिल्ला अधिकारी भोला दाहालले निर्माणाधीन सपिङ कम्प्लेक्स पूरा भएर नगरपालिकालाई हस्तान्तरण भएपछिमात्र समस्या केही हदसम्म समाधान हुने विश्वास व्यक्त गरे ।

यता, राजविराज नगरपालिकाकी कार्यवाहक नगरप्रमुख इसरत परवीनले अतिक्रमण तत्काल हटाइने बताउँदै, “यसअघि पनि सडक पेटी खाली गरिएको थियो। फेरि अतिक्रमण भएको छ भने अब चाँडै हटाइनेछ,” भनिन् ।