सरकारको निर्णय : सात दिनभित्र सूचीकरण नगर्ने सामाजिक सञ्जाल नेपालमा बन्द हुने

काठमाडौँ । सरकारको निर्णयअनुसार सात दिनभित्र नेपालमा सञ्चालन भइरहेका सामाजिक सञ्जालहरूले सूचीकरण नगरेमा ती प्लेटफर्म नेपालमा बन्द हुने भएका छन् ।

सरकारका प्रवक्ता तथा सञ्चार तथा सूचना प्रविधि मन्त्री पृथ्वी सुब्बा गुरुङले मंगलबार मन्त्रिपरिषद्को निर्णय सार्वजनिक गर्दै सर्वोच्च अदालतको आदेशअनुसार सामाजिक सञ्जाललाई व्यवस्थित गर्ने प्रक्रिया अघि बढाइएको जानकारी दिए ।

उनका अनुसार “सामाजिक सञ्जालको प्रयोगलाई व्यवस्थित गर्ने निर्देशिका, २०८० तथा अदालतको आदेशअनुसार सात दिनभित्र सञ्चार तथा सूचना प्रविधि मन्त्रालयमा सूचीकरण अनिवार्य गरिएको छ । तोकिएको अवधिभित्र सूचीकरण नभएमा ती सामाजिक सञ्जाललाई नेपालमै निष्क्रिय गराउन दूरसञ्चार प्राधिकरणलाई निर्देशन दिने निर्णय भएको हो,” उनले बताए ।

सूचीकरण गरेका सामाजिक सञ्जाल भने तत्काल सक्रिय हुनेछन् । यस निर्णयसँगै फेसबुक, युट्युब, टिकटक, इन्स्टाग्रामलगायतका लोकप्रिय प्लेटफर्मले सात दिनभित्र नेपालमा सूचीकरण प्रक्रिया पूरा गर्नुपर्नेछ ।

सञ्चार मन्त्रालयले सामाजिक सञ्जाल सञ्चालकलाई जिम्मेवार र जवाफदेही बनाउन सार्वजनिक आह्वानसमेत गरेको छ ।