बजार अनुगमन मौसमी हुनु उपभोक्तामाथि अन्याय

राजविराज । चाडपर्व नजिकिँदै जाँदा बजार अनुगमनलाई तीव्र बनाउन थालेका छन् । फलफूल, मिठाई, मासु, दुग्धजन्य पदार्थदेखि दैनिक उपभोग्य सामग्रीसम्मको मूल्य र गुणस्तर परीक्षण गर्ने काम अनुगमन टोलीले मुख्यतः चाडपर्वकै समयमा सक्रिय रूपमा गर्ने परिपाटी रहेको छ ।

तर सामान्य दिनमा भने यस्ता अनुगमन गतिविधि लगभग नहुने गरेको भन्दै आम जनताले प्रश्न उठाएका छन् । “पर्वमा मात्रै अनुगमन किन हुन्छ ? अन्य समय बजारमा गुणस्तरहीन वस्तु, महँगो मूल्य र कालोबजारी हुँदा नियमन गर्ने निकाय कहाँ हुन्छ ?” उपभोक्ताको भनाइ छ ।

चाडपर्वको बेला उपभोग्य सामानको खपत असामान्य रूपमा बढ्ने र स्वास्थ्य जोखिमको सम्भावना उच्च हुने भएकाले यस समयमा अनुगमन बढी हुने सरकारी पक्षको तर्क छ । तर जनताले भने वर्षभरि नियमित रूपमा बजार अनुगमन हुनुपर्ने र उपभोक्ता अधिकार सुरक्षित गर्न सबै समय ध्यान दिनुपर्ने माग गरेका छन् ।

यसैबीच उपभोक्ता अधिकारकर्मीहरूले समेत चाडपर्व विशेष मात्रै नभई वर्षैभर बजार अनुगमन हुने व्यवस्था मिलाउन सरकारलाई आग्रह गरेका छन् ।