बसपार्क सञ्चालन नहुँदा बजार अस्तव्यस्त, जेनजी युवाहरूको तीन दिने अल्टिमेटम

राजविराज । राजविराज बसपार्क उद्घाटन भएको चार महिना बितिसक्दा पनि हालसम्म त्यहाँबाट बस सञ्चालन सुरु हुन सकेको छैन ।

वर्षौंको प्रतीक्षापछि निर्माण सम्पन्न भई विधिवत् रूपमा उद्घाटन गरिए पनि बसपार्क अझै सुनसान छ । यसै सन्दर्भमा जेनजी युवाहरूले सम्बन्धित सरोकारवालासँग बसपार्क तत्काल सञ्चालन गर्न माग गरेका छन् ।

बिहीबार, जेनजी युवा तथा सप्तरी युथको टोलीले राजविराज–२ स्थित बसपार्कको निरीक्षण गर्दै तीन दिनभित्र सञ्चालन सुरू गर्न माग गरेका छन् । उनीहरूले चेतावनी दिँदै भने, “यदि तोकिएको समयसीमाभित्र बसपार्क सञ्चालन नभए थप दबाबमूलक कार्यक्रम घोषणा गरिनेछ ।”

सप्तरी युथका मोहन यादवका अनुसार, बसपार्क सञ्चालनमा नआउँदा बजार क्षेत्रमा अत्यधिक सवारी चापका कारण अस्तव्यस्तता सिर्जना भएको छ र दैनिकजसो साना–ठूला दुर्घटनाहरू भइरहेका छन् ।

हाल राजविराजको गजेन्द्र चौकसहित मुख्य सडकमा सवारी साधनहरू पार्किङ गरी सञ्चालन भइरहेको छ, जसले गर्दा सर्वसाधारणलाई आवागमनमा समेत कठिनाइ भइरहेको स्थानीयहरूले बताएका छन् ।

गत जेठ १५ गते, एक विशेष समारोहका बीच राजविराज नगरपालिकाकी प्रमुख ईसरत परविनले वडा नं. २ मा निर्माण सम्पन्न बसपार्कको उद्घाटन गरेकी थिइन् । तर उद्घाटनपछि पनि बसपार्क प्रयोगमा नआएपछि आलोचना सुरु भएको छ ।

गजेन्द्र नारायण सिंह अस्पताल, नेता चौक, गजेन्द्र चौक हुँदै रूपनी मोडसम्मको सडक खण्डमा दैनिकजसो सवारी जाम तथा दुर्घटनाहरू भइरहेका छन् ।

मुख्य सडकमा ढेला, अतिक्रमण गरी सञ्चालनमा रहेका पसलहरू, छाडा चौपाया, मोटरसाइकल, साइकल, बसलगायतका सवारी एउटै स्थानमा भीडभाड गर्दा दुर्घटनाको जोखिम अझै बढेको छ ।

यस विषयमा कार्यवाहक नगर प्रमुख ईसरत परविनले प्रतिक्रिया दिँदै भनिन्, “बसपार्क सञ्चालनका लागि आवश्यक अन्तिम तयारी भइरहेको  छ। भोलि (शुक्रबार) सर्वपक्षीय बैठक आह्वान गरिएको छ, जसपश्चात् बसपार्कबाट नियमित बस सञ्चालन सुरु गरिनेछ ।”