जेनजीको दवाब पछि बसपार्क सञ्चालनबारे अन्ततः सहमति, कार्यान्वयन हेर्ने सबैको नजर

राजविराज । लामो समयदेखि अलपत्र परेको राजविराज बसपार्क शनिबारदेखि सञ्चालनमा ल्याउने सहमति भएपछि पनि यसको कार्यान्वयनमा अन्योल कायमै छ ।

राजविराज–२ राजदेवी चोकमा निर्माण सम्पन्न भएर उद्घाटन भइसकेको बसपार्क हालसम्म प्रयोगमा आउन नसक्दा यात्रु तथा व्यवसायी त्रस्त बनेका छन् । शुक्रबार जिल्ला प्रशासन कार्यालयमा प्रमुख जिल्ला अधिकारीको पहलमा बसेको संयुक्त बैठकमा बसपार्क शनिबारदेखि सञ्चालन गर्ने सहमति गरिएको हो ।

बैठकमा राजविराज नगरपालिका, यातायात व्यवसायी संघ, सुरक्षा निकाय र जेनजी प्रतिनिधिहरूको सहभागिता रहेको थियो ।

कार्यवाहक मेयर इसरत परविनका अनुसार शनिबार बिहान बसपार्कमै पुनः सरोकारवालाहरूको उपस्थिति रहनेछ र अन्तिम सहमतिपछि सवारी साधन बसपार्कबाटै सञ्चालन गरिनेछ ।

तर, जेनजीका युवाहरूले पटक–पटक माग गर्दा पनि बसपार्क सञ्चालन नहुँदा असन्तुष्टि जनाउँदै शनिबारसम्म पनि कार्यान्वयन नभए आन्दोलनमा उत्रिने चेतावनी दिएका छन् ।

“अब हामीलाई आश्वासन होइन, कार्यान्वयन चाहिन्छ,” एक जेनजी प्रतिनिधिले भने, “बसपार्क तत्काल सञ्चालन नभए सडकमै विरोध गर्नेछौं ।”

गत जेठ १५ गते उद्घाटन गरिएको बसपार्क व्यवस्थापन र समन्वय अभावका कारण महिनौँदेखि बन्द अवस्थामा छ । यसले राजविराज बजार क्षेत्रमा ट्राफिक अव्यवस्था र पार्किङ समस्या निम्त्याएको छ ।