सबल नेपालले २१औं स्थापना दिवससँगै २०औं साधारण सभा सम्पन्न

राजविराज । सबल नेपालले आफ्नो २१औं स्थापना दिवसको अवसर पारेर २०औं वार्षिक साधारण सभाको आयोजना गरेको छ ।

२०६२ साल कार्तिक ७ गते स्थापित सबल नेपालले राजविराजमा उक्त कार्यक्रमको आयोजना गर्दै दुई दशकको यात्रालाई स्मरण गरेको हो ।

कार्यक्रमका प्रमुख अतिथि जिल्ला समन्वय समितिका प्रमुख शिव नारायण साहले समुदायको हितका लागि निरन्तर क्रियाशील रहँदै आएको सबल नेपालको प्रशंसा गर्दै संस्थाले समुदायको जीवनस्तरमा सकारात्मक परिवर्तन ल्याएको बताए। साथै, सबल, सक्षम तथा कर्मठ जनशक्ति उत्पादनमा संस्थाको योगदान उल्लेखनीय रहेको उल्लेख गरे ।

कार्यक्रममा सबल नेपालकी अध्यक्ष जुना गिरीले आर्थिक वर्ष २०८१/८२ को वार्षिक प्रगति प्रतिवेदन प्रस्तुत गरिन्। प्रतिवेदनअनुसार संस्थाले संमुन्नती कार्यक्रम, खानेपानी तथा सरसफाई, समानताका लागि क्रिकेट, विपद् व्यवस्थापन, सभ्य समाज निर्माण, सूचना तथा सञ्चारको विकासजस्ता परियोजनाहरू सञ्चालन गर्दै आएको छ ।

“जकर घरमे चर्पी नहि, तकर घरमे शादी नहि” भन्ने मूल नाराका साथ सबल नेपालले चर्पी निर्माण र सरसफाई अभियानमा महत्वपूर्ण भूमिका निर्वाह गर्दै आएको छ । साथै, समुदायको स्तरोन्नतिको लागि स्वच्छता, पोषण, शिक्षा, स्वास्थ्य तथा महिला क्रिकेटको विकासलगायतका क्षेत्रमा निरन्तर कार्य गरिरहेको छ ।

स्थापना दिवसको अवसरमा बालबालिकाहरूले केक काटी उत्सव मनाएका थिए ।

सबल नेपालकी अध्यक्ष जुना गिरीको अध्यक्षतामा सम्पन्न कार्यक्रममा तिलाठी–कोइलाडी गाउँपालिकाका विपद् व्यवस्थापन अधिकृत राजेश झा, संस्थाका निर्देशक दिपक कुमार झा, सदस्य तारा कटुवाल, पत्रकार चन्दनकुमार यादव, सिनियर म्यानेजर अशोक साह, परमेश्वर झा लगायतले शुभकामना मन्तव्य व्यक्त गरेका थिए। कार्यक्रमको सञ्चालन संस्थाका कोषाध्यक्ष आयुष श्रेष्ठले गरेका थिए ।