राजविराजमा अपरिचित समूहद्वारा अपहरणको प्रयास, दुई स्कारपियो प्रहरी नियन्त्रणमा

राजविराज । राजविराज नगरपालिका–११ झलहीका दिलीप यादवलाई अपरिचित समूहले अपहरण गर्न प्रयास गरेको छ ।

घटना बिहीबार राति करिब ११ बजे भएको हो । दिलीप यादव आफ्नै घरमा सुतिरहेको अवस्थामा दुईवटा स्कारपियो गाडी (मे १ च ४१७७ र प्रदेश १–०२–००२ च ७६०७) मा आएका व्यक्तिहरूले उनलाई जबरजस्ती अपहरण गर्न खोजेका थिए ।

पीडित यादवका अनुसार ती व्यक्तिहरूले कुटपिट गर्दै उनलाई गाडीमा हाल्ने प्रयास गरेका थिए । तर, स्थानियवासीहरूले प्रतिकार गरेपछि ती अपरिचित व्यक्ति गाडी सहित फरार भएका थिए ।

दिलीपका भतिज शिव प्रकाश यादवका अनुसार विदेश रोजगारका नाममा रकम ठगी गरेको आरोप लगाउँदै ती व्यक्तिहरूले जबरजस्ती उनलाई नियन्त्रणमा लिन खोजेका थिए ।

घटनापछि दुबै स्कारपियो गाडी र तिनका चालकलाई जिल्ला प्रहरी कार्यालय सप्तरीले नियन्त्रणमा लिएको छ ।

यस विषयमा जिल्ला प्रहरी कार्यालय सप्तरीका प्रहरी उपरीक्षक गौतम कुमार केसीले घटनाको अनुसन्धान भइरहेको जानकारी दिएका छन् ।