तलबभत्ता माग गर्दै कर्मचारीको आन्दोलन, कार्यालय अनिश्चितकालका लागि बन्द

राजविराज । अग्नीसाइर कृष्णसरण गाउँपालिकाका शिक्षक, स्वास्थ्यकर्मी तथा कर्मचारीहरूले तलब–भत्ता नपाएको भन्दै मंगलबारदेखि अनिश्चितकालीन आन्दोलन थालेका छन् ।

आन्दोलनमा उत्रिएका उनीहरूले विद्यालय, स्वास्थ्य संस्था तथा वडा कार्यालयसहित गाउँपालिका मातहतका सबै कार्यालय बन्द गराएका छन् ।

तलब–भत्ता उपलब्ध गराउनुपर्ने मागसहित कर्मचारीहरू आन्दोलन परिचालन समितिको नेतृत्वमा गाउँपालिका कार्यालय अगाडि तम्बू टाँगेर धर्नामा बसेका हुन् । संघर्ष समितिका संयोजक दुखन यादवको नेतृत्वमा धर्ना भइरहेको छ ।

यादवले पटक–पटक गाउँपालिकाले आश्वासन दिए पनि तलब–भत्ता नआएको आरोप लगाउँदै माग पूरा नभएसम्म आन्दोलन जारी रहने बताए। सेवाग्राहीलाई परेको असुविधाप्रति क्षमायाचना गर्दै उनले जनप्रतिनिधि, राजनीतिक दल, नागरिक समाज तथा पत्रकारसहित सबै सरोकारवालालाई समाधानका लागि पहल गर्न आग्रह गरे ।

आरोप–प्रत्यारोप
गाउँपालिका उपाध्यक्ष कल्पना कुमारी चौधरीले कर्मचारीको समस्या समाधानमा गाउँपालिका गम्भीर रहेको बताइन् । तर गाउँपालिका अध्यक्ष दिनानाथ चौधरीले प्रमुख प्रशासकीय अधिकृतलाई आवश्यक अख्तियारी नदिएकाले यस्तो समस्या सिर्जना भएको उपाध्यक्ष चौधरीको आरोप छ ।

प्रमुख प्रशासकीय अधिकृत रमेश कुमार चौधरीले भने शिक्षक तथा कर्मचारीको माग सम्बोधनका लागि अध्यक्षसँग समन्वय गर्दै समाधानकाे पहल भइरहेको बताए ।

यसअघि पनि ताला–बन्द
संघर्ष समितिले सोमबार ज्ञापनपत्र बुझाउँदै तत्काल तलब–भत्ता उपलब्ध गराउन माग राखेको थियो .। कार्तिक १८ गतेदेखि अनिश्चितकालसम्म सेवा बन्द गरेर हस्ताक्षर अभियानसहित धर्ना बस्ने चेतावनीसमेत ज्ञापनपत्रमा उल्लेख छ ।

यसअघि असोज ९ गते कार्यालयमा गरिएको ताला–बन्द अध्यक्ष चौधरीले कार्तिक १५ भित्र समस्या समाधानको प्रतिबद्धता जनाएपछि कार्तिक २ गते हटाइएको थियो। तर प्रमुख प्रशासकीय अधिकृतलाई हाजिर नगराउँदा तलब–भत्ता पाउने सुनिश्चितता नभएको संघर्ष समितिको आरोप छ ।

ज्ञापनपत्र संघीय मामिला तथा सामान्य प्रशासन मन्त्रालय, शिक्षा विज्ञान तथा प्रविधि मन्त्रालय, मुख्यमन्त्री तथा मन्त्रिपरिषद् कार्यालय मधेश प्रदेश, जिल्ला प्रशासन कार्यालय लगायत सबै सम्बन्धित निकायमा पठाइएको छ ।