एनपीएलका लागि युवा प्रतिभाहरूको भिड—जनकपुर बोल्ट्सको ट्यालेन्ट हन्ट सम्पन्न

राजविराज । नेपाल प्रिमियर लिग (एनपीएल) को आगामी संस्करणका लागि जनकपुर बोल्ट्सले तीन जना उत्कृष्ट युवा क्रिकेटर छनोट गर्न ‘ट्यालेन्ट हन्ट’ कार्यक्रम सञ्चालन गरेको छ ।

सप्तरी क्रिकेट संघको सहकार्यमा जनकपुर बोल्ट्सले मंगलबार राजविराजस्थित पविमाबि क्रिकेट मैदानमा एकदिने छनोट कार्यक्रम सम्पन्न गरेको हो । बिहान १० बजेदेखि सुरु भएको कार्यक्रममा प्रदर्शन मूल्यांकनका आधारमा तीन उत्कृष्ट खेलाडी छनोट गरिने जनकपुर बोल्ट्सका सहायक प्रशिक्षक मनोज कटुवालले बताए ।

छनोटमध्ये एक जनालाई मुख्य टोलीमा स्थान दिइनेछ भने दुई जना खेलाडीलाई डेम्लवमेन्ट स्वाडमा राखिने जनकपुर बोल्ट्सले जनाएको छ । छनोट भएका खेलाडीहरुले आगामी मंसिर १ गतेदेखि सुरु हुने नेपाल प्रिमियर लिगको दोस्रो संस्करणमा सहभागिता जनाउने अवसर पाउनेछन् ।

यसअघि नै जनकपुर बोल्ट्सले एनपीएल–२ का लागि ६ जना प्रमुख खेलाडीहरूलाई रिटेन गरिसकेको छ । ट्यालेन्ट हन्टमार्फत नयाँ प्रतिभाहरूलाई पहिचान गर्दै नेपाली क्रिकेटको स्तर उकास्ने अपेक्षा गरिएको आयोजक पक्षले जनाएको छ ।

मधेश प्रदेशका ८ वटै जिल्लाबाट ८७ जनाले उक्त छनोट अभ्यास खेलमा सहभागिता जनाएका थिए ।

कार्यक्रममा नेपाल क्रिकेट संघ (क्यान) का केन्द्रीय सदस्य तथा सप्तरी क्रिकेट संघका अध्यक्ष आयुष श्रेष्ठ, उपाध्यक्ष निरज सिंह, सचिव चन्दनकुमार यादव, कोषाध्यक्ष तुलानाथ माझी, जनकपुर बोल्ट्स टिमका म्यानेजर अनुज जैसवाल, सदस्यहरू शम्भु दास, संजय कार्की, आशिष सिंह, राहुल सिंह, गजेन्द्र माझी तथा पिच क्युरेटर धर्मेन्द्र चौधरीलगायतको उपस्थिति रहेको थियो ।