अग्नीसाईर कृष्णसवरणमा धीरेन्द्र यादवले सम्हाले प्रमुख प्रशासकको जिम्मा

राजबिराज । अग्नीसाईर कृष्णसवरण गाउँपालिकाका प्रमुख प्रशासकीय अधिकृतका रूपमा धीरेन्द्र कुमार यादव विहिबार औपचारिक रूपमा हाजिर भएका छन् ।

संघीय मामिला तथा सामान्य प्रशासन मन्त्रालयबाट सरुवा भएर गाउँपालिकामा पुगेका यादवलाई अध्यक्ष दिनानाथ चौधरी र कार्यवाहक अध्यक्ष कल्पना कुमारी चौधरीले छुट्टाछुट्टै स्वागत गरे ।

अध्यक्ष चौधरीले राजीनामा दिएपछि कार्यपालिका बैठकले उपाध्यक्षलाई कार्यवाहक अध्यक्षको जिम्मेवारी दिएको छ । सो प्रक्रियापछि जनप्रतिनिधिहरूबीचको विवाद उत्कर्षमा पुगेको अवस्थामा यादवको हाजिरलाई व्यवस्थापकीय नेतृत्वमा देखिएको अन्योल अन्त्य गर्ने कदमका रूपमा लिइएको छ ।

कार्यवाहक अध्यक्ष चौधरीको नेतृत्वमा वडा नं. १ का सबजुल खलिफा, वडा नं. २ का पशुपति प्रसाद चौधरी, वडा नं. ३ का गोपाल प्रसाद चौधरी, वडा नं. ४ का तेज नारायण यादव, वडा नं. ५ का कार्यवाहक अध्यक्ष गया प्रसाद चौधरी, वडा नं. ६ का अशोक कुमार आचार्य सहित कार्यपालिका सदस्य र कर्मचारीहरूले स्वागत गरेका थिए ।

नवहाजिर प्रमुख प्रशासकीय अधिकृत यादवले आफू विवादबीच कार्यभार सम्हाल्न आएको हुँदा अध्यक्ष तथा कार्यवाहक अध्यक्षसम्बन्धी अन्योल छिट्टै टुंग्याइने विश्वास व्यक्त गरे ।

“कागजातहरूको अध्ययनपछि मात्र अध्यक्षता सम्बन्धी आधिकारिक धारणा बनाउनेछु,” यादवले स्पष्ट पारे ।