गजेन्द्र नारायण सिंह अस्पतालमा तोडफोड तथा आगजनी, अवस्था अझै तनावग्रस्त

राजविराज । सप्तरीको गजेन्द्र नारायण सिंह अस्पतालमा आइतबार एक समूहले तोडफोड तथा आगजनी गरेका छन् ।

एनआइसियू वार्डमा राखिएको नवजात शिशुमाथि छतबाट विजुलीको बल्ब खसेर लागेको घटनापछि आक्रोशित आफन्तहरूले अस्पतालमा तोडफोड तथा आगजनी गरेको अस्पताल प्रशासनले जनाएको छ ।

रूपनी गाउँपालिका–५ हर्दियाकी रेखा यादवले आजै जन्म दिएकी शिशु उपचारमा रहेको अवस्थामा घटना भएको थियो ।

बालकका एक आफन्तले अस्पतालका निमित्त मेडिकल सुपरिन्टेन्डेन्ट दिलीप साहमाथि हातपातको प्रयास गरेको समेत अस्पतालले जानकारी दिएको छ ।

आक्रमणकारीहरूले ढुङ्गामुढा समेत गरिरहेका छन् भने सुरक्षाकर्मीहरूको बाक्लो तैनाथीबीच अवस्था नियन्त्रणमा लिन प्रयास जारी छ । अहिले अस्पताल परिसर पूर्ण रूपमा तनावग्रस्त बनेको छ ।