पूर्वाधार अभावले खेलाडीको अभ्यासमा बाधा, पिच निर्माण जारी

राजबिराज । सप्तरीमा क्रिकेट गतिविधि सक्रिय भइरहे पनि खेलाडीहरूले नियमित रूपमा अभ्यास गर्नुपर्ने नेट पिचको अभाव झेल्दै आएका छन् ।

राजबिराजस्थित पविमाबि क्रिकेट मैदानमा प्रतियोगिता सञ्चालन भए पनि खेलाडीहरूको लागि आवश्यक पर्ने नेट पिच नहुँदा उनीहरूलाई नियमित अभ्यासमा कठिनाइ भएको छ ।

“नेट पिच नहुँदा अभ्यास गर्न धेरै समस्या भोग्नु परेको छ। पिच निर्माणका लागि सम्बन्धित निकाय तथा सरकारको सहयोग आवश्यक छ,” सप्तरीका राष्ट्रिय खेलाडी अमित यादवले गुनासो व्यक्त गर्दै भने ।

नियमित अभ्यास नहुँदा प्रतियोताहरूमा समेत राम्रो प्रदर्शन गर्न खेलाडीहरू चुनौतीमा पर्ने बताउँदै पूर्व राष्ट्रिय खेलाडी पवन दासले अभ्यासका लागि उपयुक्त पूर्वाधार अत्यावश्यक रहेको बताए ।

अहिले अभ्यासको अभाव पूर्ति गर्न खेलाडीहरूले पविमाबि क्रिकेट मैदानको दक्षिण दिशामा आफैं मेहनत गरी नेट पिच निर्माण कार्य सुरु गरेका छन् ।

सप्तरी क्रिकेट संघ र केही खेलप्रेमीले सहयोग गरे पनि पिच निर्माणका लागि आवश्यक इट्टा, बालु, सिमेन्ट र श्रमिक खर्च अभाव रहेको खेलाडी अमित यादवले बताए ।

सप्तरी क्रिकेट संघका सचिव चन्दनकुमार यादवले खेलाडीहरू अभ्यासबाट वञ्चित नहोइसकून् भनेर नेट पिच निर्माणका लागि सबै क्षेत्रको सहयोग अपरिहार्य रहेको बताए ।

उनका अनुसार पविमाबि मैदानलाई राष्ट्रिय स्तरको सुविधा सम्पन्न क्रिकेट मैदान बनाउन संघको पहलमा मधेश प्रदेश सरकारले साइड स्किन, टर्फ पिच, खेलाडी पेभिलियनलगायतका पूर्वाधार निर्माण कार्य पूरा गरिसकेको जानकारी दिए ।