तीव्र गति र गलत साइड प्रयोग: हुलाकी मार्गमा पत्रकार कर्णमाथि हिट–एन्ड–रन

राजविराज ।  हुलाकी सडकखण्डमा तीव्र गति र लापरवाहीले फेरि एकपटक दुर्घटना निम्त्याएको छ । सप्तरीको विष्णुपुर गाउँपालिका–१ खुरहुरीयामा शनिबार साँझ गोरखापत्रका सप्तरी प्रतिनिधि विनयलाल कर्ण कारको ठक्करबाट घाइते भएका छन् ।

राजविराजबाट आफ्नै मोटरसाइकलमा घर फर्किंदै गरेका पत्रकार कर्णलाई सोही दिशाबाट आएको नम्बर नखुलेको कारले राति करिब ८ बजे पछाडिबाट गलत साइडमा आएर ठक्कर दिएर कार घटनास्थलबाट फरार भएको प्रहरीले जनाएको छ ।

दुर्घटनामा पत्रकार कर्णको दाहिने हात, ढाड तथा शरीरका विभिन्न भागमा चोट लागेको छ । प्रारम्भिक उपचारपछि घर लगिए पनि स्वास्थ्यमा थप असहजता देखिएपछि आइतबार गजेन्द्रनारायण सिंह अस्पतालमा भर्ना गरिएको नेपाल पत्रकार महासंघ सप्तरीका अध्यक्ष श्रवण देवले जानकारी दिए । चिकित्सकका अनुसार कर्णको अवस्था हाल सामान्य रहेको छ ।

घटनापछि स्थानीयवासीले दुर्घटनास्थलमा सुरक्षाको अभाव र हुलाकी सडकमा बढ्दो लापरवाहीप्रति चिन्ता व्यक्त गरेका छन् । कारको ठक्करबाट पत्रकार कर्णको मोटरसाइकल पूर्णरूपमा क्षतिग्रस्त भएको जनाइएको छ ।

प्रहरीले फरार कार र चालकको खोजी तीव्र बनाइएको जनाएको छ। स्थानीयले भने हुलाकी सडकमा गति नियन्त्रण, निगरानी क्यामेरा र नियमित चेकजाँचको माग गरेका छन् ।