राजबिराज बसपार्क सञ्चालनका लागि पहल गर्ने प्रतिबद्धता : यातायात मन्त्री सुमन

राजबिराज । मधेश प्रदेश सरकारका श्रम तथा यातायात मन्त्री मनिष कुमार सुमनलाई राजबिराजमा स्वागत तथा अभिनन्दन गरिएको छ ।
सोमबार राजबिराज नगरपालिका–२ स्थित सभाहलमा जनता समाजवादी पार्टी (जसपा) नेपाल, राजबिराज नगर समितिको आयोजनामा सम्पन्न स्वागत तथा अभिनन्दन कार्यक्रममा नगरवासी, नेता तथा कार्यकर्ताहरूले मन्त्री सुमनलाई फुलमाला लगाएर भव्य स्वागत गरेका थिए ।

कार्यक्रमलाई सम्बोधन गर्दै मन्त्री सुमनले राजबिराज बसपार्क सञ्चालनका लागि आवश्यक सबै प्रक्रिया पूरा भइसकेको र यातायात व्यवसायीहरू पनि तयार रहेको भए पनि अझै सञ्चालन हुन नसक्नु चिन्ताजनक रहेको बताए । उनले बसपार्क सञ्चालन नहुनुमा कावा नगरप्रमुखसहित सबै वडा अध्यक्षहरूको जवाफदेहिता आवश्यक रहेको उल्लेख गरे।

मन्त्री सुमनले राजबिराज बसपार्क तत्काल सञ्चालनमा ल्याउन आफूले आफ्नो तर्फबाट हरसम्भव पहल गर्ने प्रतिबद्धता व्यक्त गरे । साथै नगर क्षेत्रमा सिटी बस सञ्चालनका लागि चालकहरूको लाइसेन्स प्रक्रिया केही सहज बनाइनुपर्नेमा जोड दिए । सिटी बस चालकहरू लिखित परीक्षामा बढी असफल हुने गरेको उल्लेख गर्दै यातायात कार्यालयमार्फत लाइसेन्स प्रक्रिया सरल बनाउने आश्वासन दिए ।

अर्को प्रसंगमा जसपा नेपालका प्रवक्ता समेत रहेका मन्त्री सुमनले फाल्गुन २१ गते हुने प्रतिनिधि सभा निर्वाचन कुनै बहानामा नरोकिने स्पष्ट पारे । उनले निर्वाचनको तयारीमा जुट्न सम्पूर्ण नेता तथा कार्यकर्तालाई सबै वडा र पालिकाहरूमा सक्रिय रूपमा परिचालन हुन आग्रह गरे ।

कार्यक्रममा जसपा नेपालका केन्द्रीय सचिव शैलेन्द्र प्रसाद साहले फाल्गुन २१ गतेको निर्वाचनलाई संघीयताको रक्षा र प्राप्त उपलब्धिहरूको संरक्षणका लागि अभियानका रूपमा लिनुपर्ने बताए ।
त्यसैगरी जसपा नेपालका मधेश प्रदेश अध्यक्ष बालकिशोर यादवले मन्त्री सुमनले जनहितमा काम गर्दै सरकारको प्रभावकारिता बढाउने विश्वास व्यक्त गरे ।

जसपा नेपाल सप्तरीका अध्यक्ष केदार यादवले यातायात व्यवसायीहरूको अगुवाइमा बसपार्क सञ्चालन गर्ने वातावरण बनाउन मन्त्री सुमनसँग आग्रह गरे ।

कार्यक्रममा मधेश प्रदेशका पूर्व उपसभामुख उपमा देव, जसपा केन्द्रीय सदस्य रमिला साहले मन्त्री सुमनलाई सफल कार्यकालको शुभकामना दिँदै जनअपेक्षाअनुसार काम गर्न सुझाव दिए ।

जसपा नेपाल राजबिराज नगर समिति अध्यक्ष अरुण कुमार यादवको अध्यक्षतामा सम्पन्न कार्यक्रममा मधेश प्रदेश सरकारका पूर्व मन्त्री ज्ञानेन्द्र यादव, विष्णुपुर गाउँपालिका अध्यक्ष उमेश यादव, जसपा केन्द्रीय सदस्य पुनम यादव, जसपा जिल्ला उपाध्यक्ष हरेराम यादव, पार्टी नेता सुरेन्द्र प्रसाद यादव, राजबिराज नगरपालिका–२ का वडा सदस्य बिहारी साहलगायतको उल्लेखनीय उपस्थिति रहेको थियो ।