२५ औँ सशस्त्र प्रहरी दिवसको अवसरमा सुरु गरिएको पूर्व–पश्चिम झण्डा मार्च सप्तरीमा प्रवेश

राजिवराज । २५ औँ सशस्त्र प्रहरी दिवस (रजत जयन्ती) को अवसरमा सशस्त्र प्रहरी बल नेपालद्वारा सुरु गरिएको पूर्व–पश्चिम झण्डा मार्च सप्तरी जिल्लामा प्रवेश गरेको छ ।

पुस २० गते झापा जिल्लाको काँकडभिट्टा नाकाबाट सुरु गरिएको पूर्व–पश्चिम झण्डा मार्च आज सप्तरी आइपुगेको हो । सीमावर्ती क्षेत्रका नागरिक, स्थानीय तह तथा सरोकारवाला निकायहरूसँग जनसम्पर्क, विश्वास र सहयोग अभिवृद्धि गर्ने उद्देश्यले सुरु गरिएको यो झण्डा मार्च आज सप्तरी प्रवेश गरेको सशस्त्र प्रहरी बलले जनाएको छ ।

काँकडभिट्टाबाट आएको सशस्त्र प्रहरी बलको टोलीले कोशी ब्यारेजमा सशस्त्र प्रहरी बल नेपाल नं. १ बराह बाहिनीका बाहिनीपति सशस्त्र प्रहरी महानिरीक्षक कुमार न्यौपानेमार्फत सशस्त्र प्रहरी बल नेपाल नं. २ छिन्नमस्ता बाहिनीका बाहिनीपति सशस्त्र प्रहरी नायब महानिरीक्षक कृष्ण ढकाललाई औपचारिक रूपमा झण्डा हस्तान्तरण गरेपछि मधेश प्रदेशमा झण्डा मार्च कार्यक्रम सुरु भएको हो ।

सशस्त्र प्रहरी बल नेपाल नं. ६ गण हेाडक्वाटर सप्तरीका प्रहरी उपरीक्षक रोशन  बुढाथोकीका अनुसार सशस्त्र प्रहरी बलले आफ्नो रजत जयन्तीको अवसरमा पूर्वको झापा जिल्लाको काँकडभिट्टाबाट र पश्चिमको कञ्चनपुर जिल्लाबाट एकैसाथ झण्डा मार्च सुरु गरेको हो ।

दुवै दिशाबाट सुरु गरिएको झण्डा मार्च १८ दिनको अवधिमा माघ ७ गते पर्सा जिल्लाको ठोरीमा सशस्त्र प्रहरी महानिरीक्षक राजु अर्यालको उपस्थितिमा विशेष कार्यक्रमका साथ समापन गरिने जानकारी दिइएको छ ।

झण्डा मार्चको मुख्य उद्देश्य समुदायस्तरमा सशस्त्र प्रहरी बलको भूमिका, कर्तव्य, सीमा सुरक्षा तथा शान्ति सुव्यवस्थामा यसको योगदानबारे जनचेतना फैलाउनु रहेको उपरीक्षक बुढाथोकीले बताए। उनका अनुसार झण्डा मार्च टोलीले एक जिल्लाबाट अर्को जिल्लामा पुग्दै सम्बन्धित जिल्लाको सशस्त्र प्रहरी बललाई झण्डा हस्तान्तरण गर्दै अघि बढिरहेको छ ।

सीमा सुरक्षा, शान्ति व्यवस्था तथा विपद् व्यवस्थापनमा सशस्त्र प्रहरी बलले पुर्‍याएको योगदान अतुलनीय रहेको उल्लेख गर्दै उनले यस योगदानलाई कसैले पनि बिर्सन नहुने बताए ।

झण्डा मार्चको क्रममा सशस्त्र प्रहरीको टोलीले सीमावर्ती क्षेत्रहरूमा मार्चपाससमेत गर्ने कार्यक्रम रहेको छ । यसले सीमा क्षेत्रमा सुरक्षा सचेतना बढाउनुका साथै सशस्त्र प्रहरी र स्थानीय समुदायबीचको सम्बन्ध थप मजबुत बनाउने अपेक्षा गरिएको छ ।

उक्त कार्यक्रममा हनुमाननगर कंकालिनी नगरपालिकाका प्रमुख बिरेन्द्र माझी, सुनसरी तथा सप्तरी जिल्लाका जिल्ला सुरक्षा समितिका पदाधिकारी, पत्रकार, स्थानीय भद्रभलाद्मी तथा जनप्रतिनिधिहरूको उपस्थिति रहेको थियो ।

झण्डा मार्च मधेश प्रदेशका विभिन्न जिल्लाका सीमा नाकाहरू हुँदै माघ ७ गते पर्सा जिल्लाको बी.ओ.पी. ठोरीमा पुगेर औपचारिक रूपमा समापन हुनेछ ।