लोसपाको कार्यकारिणी समितिको बैठक शनिबार

काठमाण्डौं ।  लोकतान्त्रिक समाजवादी पार्टी नेपाल (लोसपा) ले कार्यकारिणी समितिको बैठक बोलाएको छ । पार्टीले  शनिबारका लागि बैठक आह्वान गरेको छ। बैठकमा पार्टीका विधान, केन्द्रीय समिति,भ्रातृ सङ्गठन गठन लगायत अन्य  विषयमा छलफल हुने कार्यकारिणी सदस्य उमाशङ्कर अरगरियाले जानकारी दिए ।

कार्यकारिणी समिति सदस्य लक्ष्मणलाल कर्ण संयोजक रहेको समितिले पार्टी विधानको मस्यौदा तयार गरेर पार्टीलाई पहिलानै बुझाइसकेको छ । सो विधानको मस्यौदामाथि शीर्ष नेताको बीचमा छलफल पनि भइसकेको छ । त्यसलाई कार्यकारिणी समितिबाट पास गराई निर्वाचन आयोगमा बुझाउने बताइएको छ ।

केन्द्रीय समिति सदस्यको नाम सङ्कलन गर्ने कार्य पनि भइरहेको छ । सङ्कलन भएको नाममा सहमति जुटाउनका लागि कार्यकारिणी समितिमा छलफल हुने बताइएको छ । त्यस्तै भ्रातृ सङ्गठनको नाम तय भइसकेको छ । त्यसको सङ्गठन निर्माणका लागि पनि छलफल हुने बताइएको छ । र सरकारलाई बुझाएको ज्ञापन पत्र अझै कार्यान्वयनमा नआएको सन्दर्भमा पनि बैठकमा छलफल हुने अरगरियाले बताए ।