बजार अनुगमनमे असहयोग करनिहार राजबिराजक ७ टा दोकान उपर कार्वाही

राजविराज । सप्तरी राजविराजक सातटा दोकान खरीद बिल नहि देखौलनि आ निगरानी मे असहयोग कएला पर जुर्माना लगाओल गेल अछि। सप्तरीके स्थानीय प्रहरी प्रशासन, घरेलु तथा साना उद्योग कार्यालयके समन्वयमे बृहस्पतिदिन दोकानके निगरानी कएलगेल छल ।

खाध गुण तथा नियन्त्रण कार्यालयके सुरेश सिंह जानकारी करौलनि अछि जे दोकान पर खरीद बिल नहि रखनाई, मॉनिटरिंग मे असहयोग आ मूल्य सूची नहि रखला के कारण  कार्यवाही कएल गेल अछि । हुनकर अनुसार मूल्य सूची नहि रखला पर राजविराजक दास हार्डवेयर पर ५० हजार रुपैया जुर्माना लगाओल गेल अछि ।

वाणिज्य, आपूर्ति एवं उपभोक्ता संरक्षण कार्यालय के सूचना अधिकारी दिलीप खांग खतबे के कहनाय छनि जे राजविराज के नूर फ्रूट एंड जनरल स्टोर, नदीना फ्रूट आ जनरल स्टोर पर २० हजार, गौरब ट्रेडर्स एंड सप्लायर पर १० हजार आ सीता ट्रेडर्स आ लेडी कलेक्शन पर ५ हजार के जुर्माना लगाओल गेल । खतबे के अनुसार बालाजी फूड क्रय एण्ड सेल सेंटर आ न्यू पूजा बस्त्रालय पर निगरानी कार्य मे सहयोग नहि करबाक कारण २० हजार रुपैया जुर्माना लगाओल गेल अछि।