श्रीलंकामा प्रदर्शनकारी द्धारा राष्ट्रपतिको निवास र कार्यालय कब्जा

श्रीलंकाका राष्ट्रपति गोटाबाया राजापाक्षेको राजीनामा माग गर्दै प्रदर्शनकारीहरूले शनिबार मध्य कोलम्बोको कडा सुरक्षामा रहेको फोर्ट क्षेत्रमा अवरोधहरू हटाएर राष्ट्रपतिको आधिकारिक निवासमा प्रवेश गरेका छन्। सुरक्षाकर्मी र प्रदर्शनकारीबीचको झडपमा दुई प्रहरीसहित कम्तीमा ३० जना घाइते भएका छन् ।

केही प्रदर्शनकारीले श्रीलंकाको झण्डा र हेलमेट बोकेका थिए । राष्ट्रपति राजापाक्षेको राजीनामा माग गर्दै फोर्ट क्षेत्रमा ठूलो संख्यामा प्रदर्शनकारी भेला भएका थिए । मुलुक गम्भीर आर्थिक संकटका कारण सरकारविरुद्ध प्रदर्शनमा उत्रिएका छन् ।

राजापाक्षेलाई गत मार्चदेखि नै राजीनामा दिन दबाब बढ्दै गएको थियो । गत अप्रिलमा प्रदर्शनकारीले उनको कार्यालयको प्रवेशद्वार कब्जा गरेपछि उनले राष्ट्रपति निवासलाई आफ्नो निवास र कार्यालयको रूपमा प्रयोग गर्दै आएका छन्। शनिबारको विरोध प्रदर्शनको आशंकाको मद्देनजर गर्दै राष्ट्रपतिलाई शुक्रबारनै निवासबाट बाहिर निकालिएको स्रोतले जनाएको छ । राष्ट्रपतिलाई कहाँ लगिएको हो थाहा नभएको स्रोतले जनाएको छ । प्रदर्शनकारीले राष्ट्रपतिको कार्यालय र सरकारी निवास दुवै कब्जा गरेका छन् ।