भारतबाट आउने संक्रमित व्यक्तिलाई नेपाल प्रवेशमा रोक, चार भारतीयको रिपोर्ट पोजेटिभ आएपछि सतर्क

मंगलबार देशभर एक हजार ९० जना नयाँ सङ्क्रमित थपिए

बैतडी । कोरोना संक्रमितको संख्या दिनप्रतिदिन बढ्दै गएपछि नेपालले भारतबाट आउने संक्रमित व्यक्तिलाई प्रवेशमा रोक लगाएको छ । मंगलबार बैतडी जिल्लाबाट प्रवेश गरेका चार भारतीयको कोभिड–१९ परीक्षण पोजेटिभ आएको थियो । त्यसपछि भारतबाट आउने सबैलाई फिर्ता पठाइयो।

पश्चिम नेपालको बैतडी जिल्लाको झुलाघाट नाकाबाट भारतीय नागरिकहरु नेपाल प्रवेश गरेका थिए । बैतडी स्वास्थ्य कार्यालयका सूचना अधिकारी विपिन लेखकले चार जना भारतीय नागरिकमा कोभिड–१९ पोजेटिभ देखिएपछि भारत फर्किन भनिएको बताए । हामीले भारतीयहरूको लागि कोभिड–१९ परीक्षणको गति बढाएका छौं, लेखकले भने ।

उनले भारतबाट फर्किएका धेरै नेपालीमा कोभिड–१९ पोजेटिभ देखिएको बताए । संक्रमण बढ्दै गएपछि नेपाल सरकारले संक्रमित भारतीय पर्यटकको प्रवेशमा रोक लगाएको उनले बताए । बैतडी जिल्ला छिमेकी भारतसँग सिमाना जोड्ने भएकाले उच्च जोखिममा छ । बैतडीमा हाल ३१ जना कोरोना सक्रिय छन् । तीन साताअघि यस जिल्लामा एउटा पनि केस आएको थिएन ।

स्वास्थ्य तथा जनसङ्ख्या मन्त्रालयले सार्वजनिक गरेको तथ्यांकअनुसार नेपालमा हाल कोभिड–१९ का घटनामा तीव्र वृद्धि भइरहेको छ भने मंगलबार देशभर एक हजार ९० जना नयाँ सङ्क्रमित थपिएका छन् । यो पछिल्लो ६ महिनामा एकै दिनमा भएको सबैभन्दा ठूलो वृद्धि हो । भाइरसबाट एकै दिन दुई जनाको मृत्यु भएको छ । नेपालमा हाल ५८७४ कोभिड-१९ को सक्रिय केसहरू छन् ।