मिटरब्याजी पीडितको समस्या बुझ्न कार्यदल सप्तरीमा

राजविराज, १२ भाद्र । मिटरव्याजीको समस्या समाधानको निम्ति सरकारद्वारा गठित कार्यदलले आइतबार सप्तरीको मिटरब्याजी पीडितहरूसँग प्रत्यक्ष भेटघाट गरी समस्याबारे  जानकारी लिएका छन ।

देशैभरका मिटर ब्याजी पीडितको वास्तविक समस्या र पीडालाई मिडियाले उजागर गरेकोले सरकार गम्भीर भएर यसको जरासम्म गई समस्या समाधानका लागि कार्यदलले स्थानीय सरकार, बैङ्किङ क्षेत्र ,प्रहरी र पत्रकार सबैसँग सहकार्य गरेर काम गरिराखेको कार्यदलका संयोजक डाक्टर भीष्म कुमार भुसालले बताएका छन ।

सप्तकोसी नगरपालिका बाहेक १७ वटै स्थानीय तहमा मिटरब्याजी पीडक विरुद्ध एक सय १४ वटा उजुरी परेको प्रमुख जिल्ला अधिकारी जनार्दन गौतम कार्यदललाई जानकारी दियो । उनले भने वास्तविक पीडितहरूलाई मिटर ब्याजीको चङ्गुलबाट मुक्त गरेर गुमाएका घर जग्गा फिर्ता हुन सक्ने आधार प्रमाण सहित काम गर्न कार्यदलले सरकारलाई सुझाउ दिनेछन् । 

मिटरब्याजी विरुद्ध सप्तरी प्रहरीले तीव्र अनुसन्धान सहित काम गर्दै आएका छन्  मिटरब्याजी खडक नगरपालिका रामदेव साह र उहाँका छोरा छोरी माथि मुद्दा दायर भएर अदालतको आदेशबाट पुर्पक्षका लागि थुनामा राखिएको सप्तरी प्रहरी प्रमुख अभिनारायण काफ्लेले जानकारी गराए  ।

साउन २७ मा मन्त्री स्तरीय निर्णयबाट गठित समितिले काम थालेसँगै  मिटर ब्याजी विरुद्ध देशैभरिमा सबभन्दा ६९ प्रतिशत उजुरी परेको मधेश प्रदेशका आठ वटै जिल्लाहरूमा स्थलगत पुगेर निष्पक्ष र पीडितको हकमा  काम गर्ने कार्यदलको उद्देश्य रहेको संयोजक डाक्टर भीष्म कुमार भुसालले बताए ।

गठित समितिका सदस्यद्वय दिनेश आचार्य , श्रीकृष्ण श्रेष्ठ  नेपाल प्रहरीका प्रहरी उपरीक्षक कृष्ण प्रसाद कोइराला लगायतको टोली,  प्रमुख जिल्ला अधिकारी, प्रहरी प्रमुख, जिल्लाका बैंक तथा वित्तीय संस्थाको शाखा प्रमुखहरू स्थानीय तहका प्रमुखहरू तथा मिटरब्याजी पीडित नागरिकहरूसँग प्रत्यक्ष छलफल गरेर समस्याहरूको प्रकृति पहिचान गरेका  छन् ।