मधेश आन्दोलनका सहिद रामकृष्ण राउतको स्मृतिमा छात्रवृति बितरण

राजविराज, २३ भाद्र । मधेश आन्दोलनका सहिद रामकृष्ण राउतको स्मृतिमा दुई जना छात्रछात्रालाई छात्रवृत्ति वितरण गरिएको छ । बिहिवार सहिद रामकृष्ण राउत स्मृति प्रतिष्ठानद्वारा सप्तरीको भारदहमा आयोजित एक समारोहका बीच छात्रछात्राहरूलाई छात्रवृत्ति वितरण गरेको हो ।

सहिद रामकृष्ण राउत स्मृति प्रतिष्ठानका अध्यक्ष राज कुमार राउतको अध्यक्षतामा आयोजित कार्यक्रममा कंकालिनी माध्यमिक विद्यालयका छात्र आशिष कुमार मण्डल र विपी माध्यमिक विद्यालयकी छात्रा प्रियंका खेडवारलाई छात्रवृत्ति प्रदान गरिएको छ ।

कार्यक्रमका प्रमुख अतिथि मधेश प्रदेशका अर्थमन्त्री शैलेन्द्र प्रसाद साह र विशिष्ट अतिथि सामाजिक विकास मन्त्री नवलकिशोर साहले नगद २ हजार ५ सय, सम्मान–पत्र र दोसल्ला ओढाएर सम्मान गरे ।

पत्रकार जितेन्द्र कुमार झा (जितु) द्वारा संचालित कार्यक्रममा स्वागत प्रतिष्ठानका उपाध्यक्ष धर्म पाल राउतले गरे । तेश्रो मधेश आन्दोलनको क्रममा सप्तरीको भारदहमा प्रहरीको गोलीबाट राउतको निधन भएको थियो ।

सहिद राउतको स्मृतिमा प्रतिष्ठान गठन गरी प्रत्येक बर्ष भदौ २३ गते जेहेन्दार २ जना विद्यार्थीहरुलाई छात्रवृत्ति प्रदान गरिदै आएको आयोजकले जनाएको छ ।