सप्तरी जिल्ला हुलाकको भवनमा अनुमति बिना नापी टोली कार्यालय

राजविराज, २४ भाद्र । जिल्ला हुलाक कार्यालय सप्तरीको भवनमा नापी कार्यालय सप्तरी अन्तर्गतका नापी टोली कार्यालय अनुमति बिना एक वर्षदेखि सञ्चालन गरिएको छ ।

साबिक राजविराज नगरपालिका १ तथा हाल वडा नम्बर ६ स्थित २ कठ्ठा १० धुर जग्गा २८ माघ, २०३८ सालमै जिल्ला हुलाक कार्यालय (साबिकका हुलाक केन्द्र अफिस) को नाममा कायम भएको हो । सोही जग्गामा हुलाकको भवन निर्माण भई विगतमा कामकाज हुँदै आएका थिए ।

तर, पछिल्लो समयमा जिल्ला प्रशासन कार्यालयलाई भवन अभाव भएपछि हुलाकको उक्त भवन (पुरानो प्रशासन कार्यालयको नागरिकता फाँट प्रशासन कार्यालयलाई प्रदान गरिएको थियो । तर, गतवर्ष जिल्ला प्रशासन कार्यालय आफ्नै नवनिर्मित भवनमा सारिए पछि अनुमति बिना नै हुलाकको उक्त भवनमा नापी टोली कार्यालय सरेको हो ।

खाली रहेको सरकारी भवनमा नियमपूर्वक अर्को सरकारी कार्यालय सञ्चालन गर्न सकिन्छ । तर, हुलाक सेवा विभागले उक्त भवन आफ्नै प्रयोजनका लागि आवश्यक भएको बताईरहेको अवस्थामा अनुमति–सहमती बिना नै नापी टोली कार्यालय सञ्चालन हुनु भनेको गैरकानूनी नै हो । यहाँसम्मकी नापी टोली कार्यालयले अहिले हुलाककै जग्गा भवन क्षेत्रमा पसलसमेत सञ्चालन गरिदिएको छ ।

यता जिल्ला हुलाक कार्यालयले जिल्ला प्रशासन कार्यालय माफ्र्त उक्त भवन हुलाकलाई आफ्नै प्रयोजनका लागि आवश्यक भएकोले खाली गराई दिन पटक–पटक पत्राचार गरेको छ । पछिल्लो पटक हुलाक कार्यालयका निमित्त प्रमुख नारायण यादवले नापी कार्यालय राजविराजलाई पनि गत चैत्र २४ मा पत्राचार गर्दै उक्त भवन आफ्नै कार्यालय प्रयोजनका लागि आवश्यक भएको र भवन मर्मत सम्भारको काम गर्नुपर्ने भएकोले खाली गराइदिन ताकेता गरेपनि नापीले कुनै जवाफ दिएको छैन ।

‘अहिले सञ्चालन रहेको जिल्ला हुलाक कार्यालय अगाडिको संरचना सडकमा परेकोले क्षेत्र साँघुरिएको र भवनसमेत आवश्यक हुँदा हामी आफ्नै पुरानो भवनमा शाखा विस्तार गर्ने योजनामा थियो’, हुलाकका प्रमुख यादवले भने, ‘तर, जिल्ला प्रशासन कार्यालयको नागरिकता फाँट खाली हुनासाथ एकाएक अनुमति बिना नापी टोली आएर बस्यो, यो सरासर गैरकानूनी हो ।’

 जिल्ला हुलाक कार्यालय सप्तरीको दायरा अहिले फराकिलो भएको छ । चिठ्ठीपत्र रजिष्ट्री, नियमित डाँक, हुलाक टिकटसँगै अब बचत बैंक पनि सञ्चालनमा छन् । यसबाहेक गतवर्षदेखि सञ्चार मन्त्रालय मातहतको मिडिया सम्बन्धी सम्पूर्ण कामको जिम्मेवारी पनि हुलाकलाई नै प्रदान गरिएको छ । ‘अहिले हामीलाई मिडिया शाखा नै सञ्चालन गर्नुपर्ने आवश्यकता छ’, हुलाक प्रमुख यादवले भने, ‘मन्त्रालयले गतवर्षदेखि नै सञ्चारमाध्यमको दर्ता, नवीकरण, अनुगमन, रातो परिचय–पत्र वितरण तथा लोक कल्याणकारी विज्ञापन वापतको रकम भुक्तानीको जिम्मेवारी पनि प्रदान गरेको छ, यो सब कामका लागि छुट्टै शाखा सञ्चालन गर्न भवन अभाव रहेको अवस्थामा नापीले अनुमति बिना हुलाकको भवन कब्जा गरेको छ ।’

हामीले पटक–पटक जिल्ला प्रशासन कार्यालयलाई पत्राचार गरी उक्त भवन खाली गराइदिन आग्रह गरेको अहिलेसम्म खासै पहल नभएको बताउँदै हुलाक प्रमुख यादवले भने, ‘हुलाकको स्वामित्वमा रहेको उक्त भवन खाली गराइदिन हुन प्रमुख जिल्ला अधिकारीसँग आग्रह गर्दछु ।’