चन्दन यादब 
चन्दन यादव, राजबिराज, २० असोज । आसन प्रतिनिधि सभा र प्रदेश सभा सदस्य निर्वाचनका लागि सप्तरीमा मुख्य निर्वाचन अधिकृतको कार्यालयको उद्घाटन गरिएको छ । बिहीवार राजबिराज स्थित नवनिर्मित खानेपानी तथा सरसफाइ डिभिजनको कार्यलयमा मुख्य निर्वाचन अधिकृतको कार्यालय तथा प्रतिनिधि सभा निर्वाचन क्षेत्र नम्बर २ को कार्यालय विधिवत सञ्चालनमा ल्याइएको हो ।
सप्तरीका मुख्य निर्वाचन अधिकृत तथा प्रतिनिधि सभा निर्वाचन क्षेत्र नम्बर २ का निर्वाचन अधिकृत एवं प्रमुख जिल्ला न्यायाधीश हेमन्त रावल तथा प्रमुख जिल्ला अधिकारी भुपेन्द्र थापाले कार्यालयको ब्यानर खोलेर उद्घाटन गरेका थिए । कार्यक्रममा मुख्य निर्वाचन अधिकृत हेमन्त रावलले स्वक्ष, निष्पक्ष वातावरणमा निर्वाचन सम्पन्न गराउन प्रतिबद्ध रहेको बताउनु भयो ।
उनले निर्वाचनको आचारसंहितामा रही राजनितिकदल हरूले मर्यादित निर्वाचन सम्पन्न गराउन आ आफ्नो भूमिकामा रहेर बढी भन्दा बढी मतदातालाई मतदानमा सहभागी गराउन माहोल बनाइदिन आग्रह गरेका छन् । निर्वाचन लोकतन्त्रका जग भएकोले स्वक्ष प्रतिस्पर्धामा सहभागी भई जिल्लाको विकास र सुशासन, समृद्विका लागि असल जनप्रतिनिधि छनोट गर्नुपर्ने बताए ।
त्यस्तै प्रमुख जिल्ला अधिकारी भुपेन्द्र थापाले जिल्लामा अधिकतम रूपमा शान्ति सुरक्षाको वातावरण बनाई निष्पक्ष निर्वाचन गराउन सबैको सहकार्य आवश्यक रहेको बताउनु भयो । कार्यक्रममा सप्तरी प्रहरी प्रमुख अबिनारायण काफ्लेले निर्वाचन भयरहित, निष्पक्ष, विश्वसनीय वातावरणमा चुनाव सम्पन्न गर्न सबै दायित्व रहेको बताए । उनले यसको लागी नेपाली सेना, सशस्त्र प्रहरी सहित सबै सुरक्षा निकायको सहभागितामा एकीकृत सुरक्षा योजना बनाएर परिचालन भइसकेको बताए ।
प्रमुख काफ्लेले यसका लागि नेपाल प्रहरीका १६ सय ३४ जना र ३२ सय ७८ जना योग्य म्यादी प्रहरी परिचालन गरिने बताए । कार्यक्रममा बरख गणका प्रमुख सेनानी दुर्गा बहादुर थापाले निर्वाचन सम्पन्न गराउन नेपाली सेना आवश्यकताको अभाव अनुसार तथा मतदान स्थलमा हुने शंकास्पद बस्तुको डिस्पोजल, बुलेट पुरूफ गाडी, हवाई गस्ती लगायतका सुरक्षा ब्यवस्था स्टेन अवस्थामा राखिने बताउनु भयो ।
यसैगरी कार्यक्रममा सहायक मतदान अधिकृत कुमार मास्के, जिल्ला निर्वाचन कार्यालय प्रमुख रमेश जोशी, नेकपा समाजवादीका नेता गोबिन्द न्योपाने, जनता समाजवादी पार्टी जिल्ला अध्यक्ष केदार यादब, तिलाठी कोईलाडी गाउपालिका अध्यक्ष अरुण मण्डल, राजबिराज नगरपालिका निमित्त प्रशासकीय अधिकृत निरन्जन यादब लगायत संचारकर्मिहरूको उपस्थिति रहेको थियो । आजै जिल्लाको ४ वटै प्रतिनिधि सभा निर्वाचन क्षेत्रहरूमा निर्वाचन कार्यालय खोलिसकेको बताईएको छ ।
निर्वाचन क्षेत्र नम्बर १ को कंचनरूप नगरपालिका को सर्वोदय उमाबिको लागि उपसचिव धर्मेन्द्र अधिकारीलाई निर्वाचन अधिकृत तोकिएको छ । त्यस्तै निर्वाचन क्षेत्र नम्बर ३ को कार्यालय शंभुनाथ नगरपालिका लागि ईजलास अधिकारी मदन प्रसाद पराजुलीलाई निर्वाचित अधिकृत तोकिएको छ भने क्षेत्र नम्बर ४ को कार्यालय खडक नगरपालिकाको लागि उपसचिव बिश्वबन्धु पौडेललाई निर्वाचन अधिकृतको जिम्म्वारी दिएको मुख्य निर्वाचन कार्यालयले जनाएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |