शक्तिपीठ छिन्नमस्ता भगवती मन्दिरको आयव्यय सार्वजनिक

राजविराज, २५ असोज । प्रसिद्ध शक्तिपीठ छिन्नमस्ता भगवती मन्दिरमा २०७९ को दशैँमा भएको आयव्यय विवरण सार्वजनिक गरिएको छ । 

छिन्नमस्ता भगवती संरक्षण सम्वर्द्धन समितिद्वारा राजविराजमा मंगलबार पत्रकार सम्मेलनको आयोजना गरी आयव्यय विवरण सार्वजनिक गरेको हो । 

छिन्नमस्ता भगवती मन्दिरका पिठाधीश एवम् समितिका कार्यवाहक अध्यक्ष महाकान्त ठाकुरको उपस्थितिमा समितिका वरिष्ठ सदस्य राम कुमार ठाकुरले २०७९ को विजय दशमीमा भएको आम्दानी १५ लाख २५ हजार ७ सय ७५ रुपैयाँ र ११ लाख ८८ हजार रुपैयाँ खर्च भएको विवरण पत्रकार सम्मेलनमा प्रस्तुत गरेका छन् ।

प्रस्तुत प्रतिवेदन अनुसार वली प्रदानबाट ४ लाख ६८ हजार ९ सय ३६, गाडी पुजनबाट ५१ हजार १ सय २८ मुण्डन बाट १३ हजार ६ सय, गाडी पार्किङबाट ३७ हजार ९९ सय, चन्दा सहयोग २५ हजार ३ सय ७६, धर्मशालाबाट ६ हजार ८ सय, फुटकर पसल ८१ हजार ९ सय ५०, विवाह ६ हजार ४ सय, पिकनिक १ हजार ९ सय २०, दान पेटिकाबाट ७२ हजार ८ सय ९६, शिघ्र दर्शनबाट ७ लाख, ५९ हजार ७ सय ८५ रुपैया नगद आम्दानी भएको छ । 

यसैगरी खर्च तर्फ रङ्गरोगन ३ लाख ५० हजार, विजुली डेकोरेसन २ लाख ७५ हजार, सरसफाइ १ लाख ५ हजार, शान्ति सुरक्षा ४५ हजार, मर्मत सम्भार २ लाख ३१ हजार, अतिथि सत्कार २५ हजार, कर्मचारीको दशैँ खर्च ९१ हजार ९ सय २० र विविध ६५ हजार ८० रुपैयाँ गरी कूल ११ लाख, ८८ हजार रुपैयाँ खर्च भएको छ । 

पत्रकार सम्मेलनमा बोल्दै पिठाधीश ठाकुरले यस वर्ष दशैँमा आम्दानी बढी र खर्चमा कमी भएकोले ३ लाख ३७ हजार ७ सय ८५ रुपैयाँ बचत भएको बताए ।