सप्तरीमा निर्वाचन आचार संहिता उल्लङघन गर्दै राजनीतिक दल, सामाजिक सञ्जालमा चुनाव प्रचार

राजविराज, २६ असोज । मंसिर ४ गते तोकिएको प्रतिनिधि सभा र  प्रदेश सभा निर्वाचनमा होमिएका सप्तरीका अधिकांश दलले निर्वाचन आचार संहिता उल्लंघन गरेको पाइएको छ । निर्वाचन आचार संहिता २०७९ विपरित अधिकांश राजनैतिक दलले चुनाव प्रचारप्रसार गरिरहेको पाइएको छ ।

उम्मेदवारको अन्तिम नामावली प्रकाशन भएपछि मतदान हुने दिन भन्दा सत्र दिन अघिदेघि मात्र निर्वाचन सम्बन्धी प्रचारप्रसार व्यवस्था भए पनि अधिकांश दलले निर्वाचन आचार संहिता उल्लंघन गरेको पाइएको छ ।

अधिकांश दलले निर्वाचन आचार संहिता विपरित पार्टीको चिन्ह अंकित टिसर्ट र टोपी प्रयोग गरेर निर्वाचन प्रचारप्रसार गरिरहेका छन् । उनीहरूका अधिकांश कार्यकर्ता पार्टीको चिह्न अंकित टिसर्ट लगाएर भेटघाटमा सहभागी बनेको देखिन्छ ।

निर्वाचनमा होमिएका राजनैतिक दलका नेताले निर्वाचन आचार संहिता विपरित सामाजिक सञ्जालमा पोष्ट गर्दै चुनाव प्रचारप्रसार गरिरहेको पाइएको छ ।  धार्मिक, सांस्कृतिक,  ऐतिहासिक स्थल वा सार्वजनिक संस्थाको भवन, स्मारक, पर्खाल, सडक, खम्बा लगायतका कुनै पनि सार्वजनिक स्थलमा पर्चा टाँस्न वा टाँस्न लगाउन नहुनेमा सप्तरीमा अधिकांश बिजुलीको खम्बामा र सबारी साधनमा पार्टीका पोस्टर र झण्डा हरू टाँसिएका र कतिपय पोलमा पार्टीको चिन्ह अंकित झन्डाहरू फहराइएका छन् ।

राजनीतिक दल वा उम्मेदवारको हकमा जुलुस वा आमसभा गर्दा उम्मेदवारको निर्वाचन चिन्ह वा झण्डा अंकित लोगो, स्टीकर वा अन्य कुनै पनि किसिमको चिज बोक्न बन्देज गरिएको छ । लाउडस्पीकर र ध्वनि उत्पन्न गर्ने यन्त्रको प्रयोग गर्न बन्देज गरिएको भएता पनि राजनैतिक दलले  आचार संहिता विपरित पार्टीको गीत बजाइरहेका छन् ।

यता सहायक निर्वाचन अधिकृत कुमार मास्केले मेमो खबर सँग कुरा गर्दै भने निर्वाचन आचारसंहिता विपरित प्रचारप्रसार गर्ने दलहरूलाई पहिलो चरणमा जानकारी गराउने र नमानेको खण्डमा कारवाही प्रक्रियामा लग्ने बताउनु भयो ।