पूर्व मेयर शैलेश सहित विभिन्न पार्टी परित्याग गरी जसपा मा प्रवेश

राजबिराज, ६ कार्तिक । लोकतान्त्रिक समाजवादी पार्टी (लोसपा) का केन्द्रीय नेता शैलेश चौधरी सहित नेता तथा कार्यकर्ताहरू जनता समाजवादी पार्टी (जसपा)  नेपालमा प्रवेश गरेका छन् । 

सप्तरीको राजविराजमा आइतबार आयोजित एक कार्यक्रमका बीच लोसपाका केन्द्रीय नेता शैलेश कुमार चौधरी, केन्द्रीय नेता एवम् मधेश बाहिनी रक्षा दलको पूर्व अध्यक्ष विनोद कुमार यादव, केन्द्रीय सदस्य पुनम यादव लगायतका दर्जनौं नेता तथा कार्यकर्ताहरू जसपामा प्रवेश गरेका छन् । 

यसैगरी सप्तरी उद्योग वाणिज्य संघका पूर्व उपाध्यक्ष शंकर दास, नेकपा एसको प्रदेश सचिवालय सदस्य अरुण देव लगायतका नेताहरु जसपामा प्रवेश गरेको जिल्ला अध्यक्ष केदार यादवले जानकारी दिए । 

नव प्रवेशी पुनम यादवको नाम लोसपाले समानुपातिक सूचीमा समेत नाम १४औं नम्बरमा सिफारिस गरेको छ । नेता चौधरी, बिनोद र पुनम मधेश मुक्ति आन्दोलनका चर्चित अनुहार हुन् । नव प्रवेशीहरूलाई जसपा अध्यक्ष उपेन्द्र यादव, केन्द्रीय नेता एवम् राष्ट्रियसभा सदस्य मृगेन्द्र कुमार सिंह यादव, पार्टीका प्रवक्ता मनिष सुमन लगायतले स्वागत गरेका छन् । 

मधेश केन्द्रित शक्तिहरु सँग चुनावी तालमेल नगरी केही नेताहरूले व्यक्तिगत स्वार्थका कारण प्रलोभनमा परि थोरै सीटमा सम्झौता गरेर पार्टीलाई नै सिध्याउने काम गरेको नवप्रवेशीहरूको आरोप छ । अन्य पार्टीहरु बाट जसपा प्रवेश गर्ने लहरका कारण जसपा शक्तिशाली बन्दै गएको छ ।सप्तरी २ बाट प्रतिनिधि सदस्यमा उम्मेदवारी दिएका जसपा अध्यक्ष यादवले सप्तरीमा कार्यकर्ता भेला, भेटघाट, छलफल तथा पार्टी प्रवेश कार्यक्रमलाई तिव्रता दिएका छन् । 

प्रतिनीधि सभा सदस्यमा मा निर्वाचित भएपछि नर्सिङ्ग कलेज, इन्जिनियरिङ्ग कलेज, रामराजा सिंह स्वास्थ्य विज्ञान प्रतिष्ठान, कृषि विश्वविद्यालय सय शैय्याको अस्पताललाई ४ सय २० बेडको सुविधा सम्पन्न अस्पताल, सडक सञ्जाल विस्तार, विद्यालय भवन निर्माण लगायत विभिन्न ४२ ओटा कामहरु गरेका छन् । तीमध्ये केही काम पुरा पनि भइसकेको छ भने बाँकी निर्माणका क्रममा रहेका छन् । सप्तरीको कायापलट गर्ने सङ्कल्पका साथ महत्वपूर्ण योजनाहरू अगाडि बढाएका कारण जसपा अध्यक्ष उपेन्द्र यादवको पक्षमा माहोल बन्दै गएको छ । यस अघि लोसपाबाटै तिलाठी कोइलाडीका पूर्व मेयर समेत रहेका युवा नेता सतिश कुमार सिंहको नेतृत्वमा केही नेता तथा कार्यकर्ताहरु पार्टी परित्याग गरेका थिए । उनी जनमत पार्टीबाट प्रदेश सभा सदस्यमा सप्तरी २ क बाट उम्मेदवार बनेका छन् ।