जिल्लालाई स्वास्थ्य र शिक्षाको केन्द्र बनाउनु पर्छ : उपेन्द्र यादव

राजबिराज, १७ कार्तिक  । जनता समाजवादी पार्टीका अध्यक्ष एवं सप्तरी निर्वाचन क्षेत्र नम्बर २ का प्रतिनिधिसभा सदस्यका उम्मेदवार उपेन्द्र यादवले जिल्लालाई स्वास्थ्य र शिक्षाको केन्द्र बनाई विकास कार्यलाई अगाडि बढाउनुपर्नेमा जोड दिएका छन् । 

राजविराजमा बिहीवार गजेन्द्रनारायण सिंह अस्पतालमा कार्यरत चिकित्सक तथा स्वास्थ्यकर्मी हरुसंग भेटघाटको क्रममा बोल्दै उनले स्वास्थ्य र शिक्षा क्षेत्रको विकासमा जोड दिएका हुन । 

कार्यक्रममा बोल्दै अध्यक्ष यादवले  रामराजा सिंह स्वास्थ्य विज्ञान प्रतिष्ठानको कार्य अगाडि बढेसँगै सप्तरीको विकासको आधारशिला प्रारम्भ भइसकेको बताए । 

सप्तरीमा विशिष्ट सेवा भएको अस्पतालको रुपमा पूर्वाधार निर्माणको कार्य अगाडि बढिसकेको छ, अध्यक्ष यादवले भने, अस्पताल निर्माण कार्यले पूर्णता पाउनसाथ सप्तरीको अवस्था नै फरक देखिन्छ साथै स्वास्थ्य सेवा लिन बाहिर जानुपर्ने बाध्यताको अन्त्य हुने तथा हजारौँले रोजगारी पाउनेछ्न् । 

अस्पताल र क्याम्पसहरूले गर्दा विराटनगर र धरानको विकासले गति लिएको चर्चा गर्दै अध्यक्ष यादवले जिल्लाको विकासका लागि रामराजा सिंह स्वास्थ्य विज्ञान प्रतिष्ठान, गजेन्द्रनारायण सिंह अस्पतालमा नर्सिङ कलेजको पूर्वाधार निर्माण, इन्जिनियरिङ क्याम्पस र कृषि विश्वविद्यालय सञ्चालनमा आउनसाथ जिल्लाको विकासमा ठूलो परिवर्तन आउने विश्वास व्यक्त गरे । 

उनले रामराजा सिंह स्वास्थ्य विज्ञान प्रतिष्ठानलाई पूर्वी नेपालको विपि कोइराला स्वास्थ्य विज्ञान प्रतिष्ठान पछिको ठूलो मेडिकल हवको रुपमा विकास गर्नुपर्नेमा जोड दिए । 

गजेन्द्रनारायण सिंह अस्पताललाई आधुनिक सेवा सम्पन्न अस्पताल निर्माणमा सबैपक्षको सहयोग आवश्यक रहेको बताउँदै अध्यक्ष यादवले अस्पतालको समग्र विकासका लागि आफूले गरेको सहयोगलाई निरन्तरता दिने प्रतिबद्धता व्यक्त गरे ।

गजेन्द्रनारायण सिंह अस्पतालमा दरबन्दी अनुसारको चिकित्सक बस्न नसक्नु दुर्भाग्यपुर्ण भएको बताउँदै अध्यक्ष यादवले चिकित्सकहरूलाई बस्ने वातावरणको सिर्जना गर्नु जिल्ला बसिको पनि दायित्व भएको उल्लेख गरे । 

सप्तरीको विकास गर्ने लक्ष्य लिएर आफ्नो जन्मथलोलाई कर्मथलो बनाएर आफूले सप्तरीलाई छानेको उल्लेख गर्दै उनले  जिल्लावासीको पुर्ण साथ सहयोग पाउने विश्वास व्यक्त गरे ।   गजेन्द्रनारायण सिंह अस्पतालका प्रमुख मेडिकल सुपरिटेन्डेन्ट डा. प्रकाश प्रसाद साहले उपकरणको ब्यवस्था भएपनि प्राविधिक र आवश्यक जनशक्ति अभावले सेवा प्रभावित हुने गरेको बताए । 

उनले दरबन्दी अनुसारको चिकित्सक र स्वास्थ्यकर्मी नहुदाँ सेवाप्रबाहामा कठिनाइ हुने गरेकाले रिक्त पदपूर्तिका लागि पहल गरिदिन आग्रह गरे । उक्त अवसरमा पुर्व उपप्रधानमन्त्री तथा स्वास्थ्यमन्त्री समेत रहेको अध्यक्ष यादवले अस्पतालको निर्माणाधीन नर्सिङ कलेज तथा अस्पतालको अबस्था बारे  अनुगमन गरि जानकारी समेत लिएका थिए ।