जसपा द्वारा प्रतिबद्धता पत्र सार्वजनिक, एक परिवार एक रोजगारको नीति अवलम्बन

राजबिराज, १९ कार्तिक । जनता समाजवादी पार्टी (जसपा) नेपालका अध्यक्ष उपेन्द्र यादवले अहिलेको संघीय शैली परिवर्तन गर्नु पर्ने बताएका छन् । 

४ मङ्सिरमा हुन लागेको प्रतिनिधिसभा र प्रदेशसभा निर्वाचनका लागि जसपाले आज प्रतिबद्धता पत्र सार्वजनिक गर्दै यस्तो बताएका हुन् । सो प्रतिबद्धता पत्रमा सार्वजनिकका क्रममा संविधान संशोधनमार्फत १० प्रदेशको शैलीमा जाने बताए । 

 यस्तै, बहिष्करणमा परेका समुदायलाई सामाजिक न्यायको प्रणाली विकास गरी समावेशी लोकतन्त्रको अभ्यास गर्नु पर्ने उनले बताए ।  जनता समाजवादी पार्टीले राजनीतिज्ञ र विशेषज्ञहरू मध्येबाट राष्ट्रपतिले मन्त्रीहरू नियुक्त गर्ने चुनावी प्रतिवद्धता गरेको छ ।  

शक्तिपृथकीकरण को सिद्धान्तअनुरूप राष्ट्रपतिले मन्त्री नियुक्त गर्ने व्यवस्था अघि सारेको छ । जसपाले प्रदेशहरूमा मुख्यमन्त्री तथा विशेष संरचना र स्थानीय तहहरूमा त्यहाँको कार्यकारी प्रमुख पनि बालिग मताधिकारका आधारमा प्रत्यक्ष निर्वाचित हुने व्यवस्था गर्ने चुनावी प्रतिवद्धता गरेको छ । 

संविधानमा रहेका त्रुटि र अपूर्णताहरूलाई संविधान संशोधनमार्फत पूरा गर्दै सर्वस्वीकार्य बनाउँदै राष्ट्रको उत्थान गर्ने चुनावी प्रतिवद्धतापत्रमा उल्लेख छ । 

घोषणापत्रमा नेपाललाई स्वतन्त्र, सार्वभौम, समावेशी, लोकतान्त्रिक, विभेदरहित, धर्मनिरपेक्ष, संघीय समाजवादी गणतन्त्रात्मक बहुराष्ट्रिय राज्यका रूपमा स्थापित गर्ने भनिएको छ । 

कार्य क्षमताको अभाव र खराब आचरण भएको वस्तुनिष्ठ आधार र कारणहरू भएमा सबै तहका सरकारको पदाधिकारीहरूमाथि प्रत्याह्वान गर्न वा महाअभियोग लगाउन सकिने व्यवस्था गर्ने उल्लेख छ ।  

नागरिकहरूलाई गास, बास र कपासको व्यवस्था गर्न एक परिवार एक रोजगारको नीति अवलम्बन गर्ने चुनावी प्रतिवद्धतापत्रमा भनिएको छ। 

आसन्न प्रतिनिधिसभा र प्रदेशसभा लाई लक्षित गर्दै जारी घोषणापत्रमा बालिग मताधिकारमा आधारित जनताद्वारा निर्वाचित कार्यकारी राष्ट्रपति हुने व्यवस्था गर्ने उल्लेख छ।