लोकतान्त्रिक गठबन्धन द्वारा राजबिराजमा प्रदर्शन, सप्तरी-२ मा फराकिलो मतान्तरले जित्ने सत्ता गठबन्धनको दाबी

राजविराज, १ मंसिर । सप्तरी क्षेत्र नम्बर २ मा लोकतान्त्रिक(वाम गठबन्धनले फराकिलो मतान्तरले जित्ने दाबी गरेको छ । मौन अवधी सुरु हुनु दुई दिन अगावै सप्तरी क्षेत्र नं. २ मा बुधबार लोकतान्त्रिक–बाम गठबन्धनले शक्ति प्रदर्शनक्रममा नेताहरूले सो कुरा दाबी गरेको हो ।

निर्वाचन क्षेत्र नं. २ को प्रतिनिधिसभा सदस्यतर्फ सत्तारुढ गठबन्धनका साझा उम्मेदवार जयप्रकाश ठाकुर र गठबन्धनमा आवद्ध प्रदेशसभा सदस्य २ को १ का उम्मेदवार सरोज मण्डल र २ को २ का उम्मेदवार उमेशप्रसाद यादवले संयुक्त रुपमा शक्ति प्रदर्शन गरेका हुन् ।

राजविराजस्थित पब्लिक बिन्देश्वरी माध्यमिक विद्यालयको खेलमैदानबाट हजारौंको संख्यामा निस्केको जुलुस नगर परिक्रमा गर्दै पुनः सोही स्थानमा पुगेर चुनावी सभामा परिणत भएको थियो । जुलुसमा काँग्रेस, लोसपा, माओवादी र एकीकृत समाजवादीका जिल्लास्तरिय नेता कार्यकर्ताका साथै सर्वसाधारणसमेतको सहभागिता देखिन्थ्यो ।

चुनावी प्रचार प्रसारका क्रममा पहिलो पटक गठबन्धनका उम्मेदवारले संयुक्त रुपमा यस्तो जुलुस निकालेका हुन् । गठबन्धन आवद्ध दलका जिल्ला नेताहरुसँगै स्थानिय कार्यकर्ताको समेत उत्साहजनक सहभागिताले मनोवल उच्च भएको सत्तारुढ गठबन्धनका तर्फबाट प्रतिनिधिसभाका उम्मेदवार रहेका ठाकुरले बताए ।

निर्वाचन कार्यक्रम अनुसार मंसिर ४ गते आइतबार हुने निर्वाचनका लागि बिहीबार राती १२ बजे देखी मौन अवधी सुरु हुँदैछ । मौन अवधी अगावै प्रचारप्रसार सकाएर मतदातालाई आफ्नो पक्षमा पार्ने अन्तिम प्रयास स्वरुप विभिन्न दलका उम्मेदवारहरुद्वारा घरदैलो, चुनावी सभा र रोड शो लगायतका गतिविधी तिब्र बनाएका छन् ।

लोकतान्त्रिक समाजवादी पार्टीका नेता दीपेन्द्र चौधरीले यस क्षेत्रका जनता नयाँ अनुहारलाई जिताउन चाहेको बताए । पुरानो अनुहारलाई बिदाइ गरेर नयाँ अनुहारलाई जिताउन यहाँका युवा, महिला र मतदाताहरू चुनावी मैदानमा दिनरात खटिरहेको उनको भनाइ छ ।

लोकतान्त्रिक(वाम गठबन्धनका तर्फबाट सप्तरी क्षेत्र नम्बर २ मा प्रतिनिधिसभा सदस्यका लागि जयप्रकाश ठाकुर र प्रदेशसभा ९क० मा सरोज मण्डल तथा प्रदेशसभा ९ख०मा उमेशकुमार यादवले उमेदवारी दिएका छन् । उमेदवारलाई विजयी गराउन यतिखेर कार्यकर्ताहरू कम्मर कसेर लागिपरेका छन् ।

हामीले फराकिलो अन्तरसहित जित हासिल गर्नेछौँ, नेता चौधरीले दाबी गरे । नेकपा (एकीकृत समाजवादी) का बुथ कमिटी अध्यक्ष उमेशनारायण यादवले यस क्षेत्रमा गठबन्धकै उमेदवार जित्नेमा शंका नरहेको बताए ।

नेकपा (माओवादी केन्द्र) का जिल्ला कमिटी सदस्य बिनोदकुमार यादवले सत्तारूढ पाँच पार्टी मिलेर बनेको गठबन्धनलाई जिताउन कार्यकर्ताहरू लागि परेको बताए ।

माओवादीकी समर्थक गीता चौहानले यस क्षेत्रको विकासका लागि सत्ता गठबन्धन जित्नुको विकल्प नरहेको बताइन् । हाम्रा गठबन्धनका सबै उमेदवार विकासप्रेमी हुन् । विकास चाहिएको छ भने जनताले जिताउनै पर्छ, उनले भनिन् ।

कांग्रेसका स्थानीय नेता मो सलिमले सत्ता गठबन्धनका सबै उमेदवार विजयी हुने दाबी गरे । यसैबीच, लोकतान्त्रिक(वाम गठबन्धन दलले उम्मेदवार सहित सप्तरीको राजविराजमा बुधवार शक्ति प्रदर्शन गरेको छ ।गठबन्धनले उमेदवारसहित र्‍याली निकालेको थियो ।