युवा निर्देशक दासको ‘अहाँ बात करू’ म्युजिक भिडियो सार्वजनिक (भिडियो सहित)

राजविराज, १० मंसिर । रोशन दासको निर्देशन, कथा र परिकल्पना मैथिली सिने क्षेत्रमा मैथिलीकर्मीहरूले बडो सकारात्मकताका साथ लिई रहेका छन् ।

केही दशक पहिले मैथिल समाजलाई पृष्ठभूमि बनाएर छोटो कथावस्तुमा तयार पारिएको म्युजिक भिडियोमा एक जोडीको रोमाञ्चक एवं सघर्षील प्रेम कथा प्रस्तुत गरिएको छ ।

वरिष्ठ सङ्गीतज्ञ गुरुदेव कामतको शब्द र सङ्गीत रहेको यस गीतमा मधुर स्वरका धनी डा. शैलेश कुमार मिश्रले आफ्नो स्वर दिएका हुन्। प्रसिद्ध सङ्गीतकार शैलेन्द्र विश्वकर्माद्वारा सङ्गीत संयोजन गरिएको छ ।

सपना साह र मुकेश साहको मुख्य भूमिकामा रहेको यो म्यूजिक भिडियो ‘रेज ईन्टरनेन्मेन्ट’ युट्युबबाट सार्वजनिक गरिएको छ। म्युजिक भिडियोलाई एच।पी कँडेलले छाँयाङ्कन गरेका हुन् भने कवीर ओडले सम्पादन गरेका हुन् । 

 उक्त गीतलाई मैथिलीको प्रथम म्युजिक स्ट्रीमिङ्ग एप ‘म्युजिक मैथिली’ मा समेत सुन्न सकिन्छ ।

मिथिलाको यो एउटा पुरानो प्रेम कथा मैथिलीको ओईली रहेको पर्दाको लागि सुगन्धित कोसेलीको रूपमा बाहिरिएको छ। स्तरीयता, मौलिकता, मधुरता भर्दै यो भिडियो निश्चय मैथिली फिल्म पथको लागि ‘माइलस्टोन’ साबित हुने युवा सङ्गीतकर्मी विद्यानन्द वेदर्दीले बताए ।