अग्नीसाइरमा आधारभूत विद्यालयको नवनिर्मित दुई कोठे भवनको उद्घाटन

राजबिराज, २४ मंसिर । मधेश प्रदेशका सामाजिक विकास मन्त्री एवम् सप्तरी निर्वाचन क्षेत्र नम्बर १ सामाजिक विकास मन्त्रालय मधेश प्रदेशको सहयोगमा सप्तरीको अग्नीसाइर कृष्णासवरन – ५ स्थित आधारभूत विद्यालयको नवनिर्मित दुई कोठे भवनको शुक्रबार उद्घाटन गरेका छन् । 

कार्यक्रममा बोल्दै नवनिर्वाचित प्रतिनिधिसभा सदस्य एवम् मन्त्री साहले देश विकासका लागि शिक्षा क्षेत्रमा भएको समस्या अन्त हुनु अपरिहार्य रहने बताए । जनता शिक्षित र सचेत नभए सम्म विकासको कार्यले गति लिन सक्दैन, मन्त्री साहले भने, शिक्षा क्षेत्रको उन्नति विना मुलुकको परिवर्तन कल्पनासम्म गर्न सकिदैन । उनले सामाजिक परिवर्तनका लागि शिक्षा क्षेत्र सबल हुनुपर्नेमा जोड दिए । 

मन्त्री साहले शिक्षामा भएको नीतिगत त्रुटिले शिक्षा क्षेत्रमा भएको समस्या सम्बोधन हुन नसको बताउँदै नयाँ शिक्षा ऐन ल्याउनुपर्ने आवश्यकता औलाए । त्रुटिपूर्ण शिक्षा नीतिको कारण विद्यालयमा शिक्षक भर्ना समेत गर्न कठिनाइ छ, मन्त्री साहले भने, स्थानीय तहमा विद्यालय हस्तान्तरण गरेपनि कानुनको अभावले स्थानीय सरकारले चाहेरपनि समस्या सम्बोधन गर्न सक्ने अवस्था छैन । 

मधेश प्रदेशको सामाजिक विकास मन्त्रीको जिम्मेवारीमा रहँदा धेरै विद्यालयहरूको पूर्वाधार विकासको कार्य गर्ने अवसर प्राप्त भएको बताउँदै कार्यक्रमका प्रमुख अतिथि मन्त्री साहले विद्यालयको थप अन्य समस्या समाधानका लागि पहल गर्ने प्रतिबद्धता व्यक्त गरे । क्षेत्रबासीले प्रतिनिधिसभा सदस्यमा निर्वाचित गरेर सेवा गर्ने अवसर प्रदान गरेको छ,उनले भने, जनमतको उच्च कदर गर्दै क्षेत्रको सर्वाङ्गीण विकासका लागि प्रयत्नशील रहनेछु । 

अग्नीसाइर कृष्णासवरन गाउँपालिकाका अध्यक्ष दिनानाथ चौधरीले विद्यालयहरूमा शिक्षकको पदपूर्ति गर्ने बताए । मधेश स्वास्थ्य विज्ञान प्रतिष्ठानका सदस्य दिनेश कुमार यादवले शिक्षामा भएको विकृति अन्त्यका लागि सरोकारवालाहरू जागरुक हुनुपर्नेमा जोड दिए । 

समाजसेवी पूर्व लेखापाल राम नारायण मेहताले भवन निर्वाणमा सहयोग गरेकोमा मन्त्री साहलाई धन्यवाद दिदै विद्यालयको समग्र विकासमा सहयोगका लागि आग्रह गरे । 

अग्नीसाइर कृष्णासवरन गाउँपालिका वडा नम्बर ५ का वडा अध्यक्ष सवदुल मियाँको अध्यक्षतामा आयोजित कार्यक्रममा जसपा संघीय परिषद् सदस्य गुनानन्द चौधरी, जिल्ला सहसचिव रामचन्द्र साह, सामाजिक अभियन्ता रोशन कुमार मण्डर, जसपा नेता राज कुमार यादव, विजय चौधरी, दुर्गानन्द चौधरी, रमेश चौधरी, देवराम यादव, महेन्द्र यादव, पत्रकार बृजमान तामाङ, दिननाथ यादव लगायतका स्थानीय जनप्रतिनिधि, बुद्विजिवी समाजसेवी, विद्यालय व्यवस्थापन समितिका सदस्य, शिक्षक, विधार्थीहरुको उपस्तिथि रहेको थियो ।

विद्यालयको शिक्षक जयराम मण्डलद्वारा संचालित कार्यक्रममा स्वागत प्रधानाध्यापक चन्द्र नारायण यादवले गरे । उक्त भवन मधेश प्रदेश सामाजिक विकास मन्त्रालयको १८ लाखको लागतमा निर्माण भएको विद्यालयले जनाएको छ ।