आगोमा जलेर मुक्तीको मृत्यु

राजबिराज, १३ पुस । गोठघरमा लागेको आगोमा जलेर मुक्ती राउतको मृत्यु भएको छ । 

सप्तरीको बोदे बर्साइन नगरपालिका ४ मा रहेको एक गोठघरमा घुरबाट आगो सल्कँदा गोठमै सुतिरहेका ८० वर्षीय राउतको मृत्यु भएको हो । प्रहरीका अनुसार घुरबाट गोठघरमा आगो सल्कँदा वृद्ध राउत गोठमै रहेको बाकसमाथि सुतिरहेका थिए । 

आगलागी भएको बेला सुतिरहेका उनले आगो लागेको थाहा पाएपछि निस्किन नसक्दा ज्यान गएको स्थानीयले बताए । उनलाई आगोबाट निकाल्न खोज्दा २५ वर्षीय नातिको हात जलेको छ । 

आगलागीबाट गोठघर पूरै जलेको छ । गएराति साढे १२ बजे लागेको आगो स्थानीयवासी र प्रहरीले साढे १ बजे नियन्त्रणमा लिएको थियो ।