विमान दुर्घटनामा मृत्यु भएका पत्रकार पौडेलको सम्झनामा दीप प्रज्वलन

राजबिराज, ३ माघ । पोखरामा भएको विमान दुर्घटनामा ज्यान गुमाएका  प्रेस सेन्टर नेपालका केन्द्रिय उपाध्यक्ष एवम् नेपाल पत्रकार महासंघका केन्द्रिय सदस्य त्रिभुवन पौडेलको सम्झनामा  प्रेस सेन्टर नेपाल सप्तरी शाखाले राजविराजस्थित शहीद दशन चौकमा दीप प्रज्वलन गरिएको छ । 

विमान दुर्घटनामा प्रेस सेन्टर नेपालका उपाध्यक्ष  सहित ७२ जनाले ज्यान गुमाएकाले मृत आत्माको शान्तिका लागि दीप प्रज्वलन कार्यक्रमको आयोजना गरिएको प्रेस सेन्टर सप्तरी शाखाका अध्यक्ष दिनानाथ यादवले बताए ।

दीप प्रज्वलन कार्यक्रममा प्रेस सेन्टरका केन्द्रिय सल्लाहकार देवराम यादव, सेन्टरका मधेश प्रदेश महासचिव गोपाल प्रसाद गुप्ता, पत्रकार महासंघका पूर्व केन्द्रिय सदस्य अवधेश झा, पत्रकार प्रिया सिंह थारु लगायत संचारकर्मी र नगरवासी सहभागी भएका थिए । 

चार जना चालक दलका सदस्य सहित ७२ जना सवार भएको विमान आइतबार बिहान करिब ११ बजेतिर पोखराको सेती नदी खोंचमा दुर्घटना भएको थियो ।