विकासको लागि निर्मम बनेर पनि कानुन बनाएर लागू गर्नु जरुरी : शिक्षा मन्त्री महेश

राजविराज । अन्तराष्ट्रिय मातृभाषा दिवसको अवसरमा मंगलबार मैथिली साहित्य परिषद् र मैथिल महिला परिषदद्वारा सप्तरीको राजविराजमा आयोजित मातृभाषामा अनिवार्य शिक्षा विषयको विचार गोष्ठी एवम् सम्मान कार्यक्रममा प्रमुख अतिथिको आसनबाट बोल्दै मधेश प्रदेशका शिक्षा, विज्ञान, प्रविधि तथा वाणिज्य मन्त्री महेश प्रसाद यादवले मातृभाषामा पठनपाठन सुरु नभएसम्म साक्षर प्रदेश बनाउने सोच पुरा हुन नसक्ने बताएका छन् । 

चुनौतीहरू धेरै भएपनि आफू पछाडि नहट्ने बताएका छन् । समस्यालाई क्रमशः समाधान गर्नुपर्छ, सफल हुन्छौं ।’ उनले विकासको लागि निर्मम बनेर पनि कानुन बनाएर लागू गर्नु जरुरी रहेको बताए । ‘कुनै कानुन बनाउँदा धेरैजनालाई नराम्रो लाग्न सक्छ,’ उनले भने ‘तर सुधार गर्नको लागि पनि कानुन बनाउनु आवश्यक छ, त्यसलाई कार्यान्वयन गराउनु जरुरी छ, अनि मात्र विकास हुन्छ ।’

मैथिली साहित्य परिषद्को अध्यक्ष सतिश दत्तको अध्यक्षतामा भएको उक्त कार्यक्रममा मधेश प्रदेशका सांसद गोविन्द बहादुर न्यौपाने, माला कर्ण, किरण साह, मनिष कुमार सुमन, परिषदका उपाध्यक्ष श्याम सुन्दर यादव, परिषदको पूर्व अध्यक्ष देवेन्द्र मिश्र, पूर्व उपाध्यक्ष दिपेन्द्र चौधरी लगायतकाले मन्तव्य व्यक्त गरेका थिए । विभिन्न वक्ताहरूले विद्यालयमा मैथिली विषयको अनिवार्य रुपमा पठनपाठनको व्यवस्था मिलाउन पहल गर्न मन्त्री यादवसँग आग्रह गरेका थिए । कार्यक्रममा संसदमा मैथिलीमा सपथ लिएका प्रदेश सभा सदस्यहरुलाई सम्मान समेत गरिएको थियो ।