चर्चित गायक झा तथा गीतकार बेदर्दीले पाए राष्ट्रिय समावेशी म्युजिक अवार्ड

राजविराज । ” नेपाली हुनुमा गर्व गरौँ, नेपाली कला र संस्कृतिको जगेर्ना गरौँ ” भन्ने मूल नाराका साथ पावर ईन्टरनेशनल मिडिया (पिम नेपाल) द्वारा आयोजित नेपालको पहिलो ‘राष्ट्रिय समावेशी म्युजिक अवार्ड २०७९’ फागुन २८ गते आइतबार ललितपुर काठमाण्डौमा सम्पन्न भएको छ ।

विगत ६ वर्षदेखि नियमित गीत सङ्गीतहरूको प्रवर्द्धनमा सहयोग पुर्याउने उद्देश्यले नेपाली सहित एक दर्जन भाषाभाषीको गीतलाई समेटेर अवार्ड आयोजना हुँदै आएको छ ।

विभिन्न भाषाभाषीका कुल ४२ विधामा प्रतिष्पर्धा रहेका देशभरिका कलाकार, स्रष्टा तथा सर्जकहरू मध्ये मिथिला-मधेशका मिथिला रत्न तथा मिथिला विभूतिबाट विभूषित गायक विरेन्द्र झा तथा युवा गीतकार विद्यानन्द बेदर्दीले सर्वोत्कृष्ट मैथिली गीतकार “निम अवार्ड २०७९” बाट सम्मानित भएका छन् । दुवै जना सप्तरीका वासी हुन ।

मिथिला रत्न तथा मिथिला विभूतिबाट विभूषित गायक विरेन्द्र झाको स्वर रहेको मैथिली भाषाको होली गीत “हमरो रंग लगा दे” र गीतकार विद्यानन्द बेदर्दी द्धारा रचित होली गीत “प्रेमक पिचकारी” अवार्डको लागी समावेश भएका थिए ।

उक्त अवार्ड कार्यक्रममा संघीय मामिला तथा सामान्य प्रशासन मन्त्री अमनलाल मोदीेको प्रमुख आथित्य र विशिष्ट अतिथिका रुपमा पूर्व शिक्षा मन्त्री एवं पुर्व उपसभामुख चित्रलेखा यादव, चलचित्र प्राविधिक संघका अध्यक्ष पुष्कर लामा, चलचित्र नृत्यकार संघका अध्यक्ष जनक कार्की, निर्देशक समाजका महासचिव जनकदिप पराजुली, चलचित्र निर्देशक ऋषि लामिछाने, अरुण प्रधान, डेल्फिक काउन्सिल नेपालका अध्यक्ष श्रीदेव विएल, चलचित्र विकास बोर्डका चिरञ्जिवी गुरागाई लगायत बरिष्ठ तथा विशिष्ट व्यक्तित्व हरुको सहभागिता थियो ।