मुक्त हरवाचरवाको न्यायिक पुनः स्थापनाका लागि राजविराजबाट पैदल यात्रा सुरु

राजबिराज, २५ चैत्र ।  हरवाचरवाहरूले राजविराजबाट जनकपुरका लागी पैदल यात्रा सुरु गरेको छ । शनिवार राजबिराजको नेता चौकवाट सुरू गरेको पैदल यात्रा राजबिराज नगरको विभिन्न ठाउको परिक्रमा गर्दे रुपनी हुँदै जनकपुरको लागि यात्रा सुरू गरेको हो ।

हरवाचरवा प्रथा मुक्ति घोषणा भएको ९ महिना वितिसक्दा पनि सरकार कार्यान्वयन गर्न गम्भिर नदेखिएको भन्दै विभिन्न मागसहित हरवाचरवाहरुको यात्रा चैत्र २९ गते जनकपुर पुग्ने बताईएको छ ।

राजविराजबाट शुरु हुने हरवाचरवा अधिकार यात्रामा सप्तरी, सिराहा, महोत्तरी र धनुषाका १ हजार ५ सय हरवाचरवा अगुवा सहभागि हुने राष्ट्रिय दलित नेटवर्कका केन्द्रीय अध्यक्ष गणेश विश्वकर्माले जानकरी दिए । 

मधेश प्रदेशको आठ वटै जिल्लाका हरवाचरवा दवाव दिन जनकपुरमा भेला हुन लागेका हुन् । शुक्रवार राजविराजमा पत्रकार सम्मेलनको आयोजना गरी राष्ट्रिय हरवाचरवा अधिकार मञ्चका महासचिव लागेन्द्र सदाले सो जानकारी गराएका हुन् । २०७९ साल साउन २ गते सरकारले हरवाचरवा प्रथाको मुक्तिको घोषणा गरेपनि व्यवहार र कार्यान्वयन पक्ष फितलो भएको भन्दै हरवाचरवा पुनः आन्दोलित भएका हुन् ।

 उनीहरूले मुक्त हरवाचरवाको रोजगारी, सामाजिक समावेशीकरण सुनिश्चितता, जातीय छुवाछुत गर्नेलाई कडा कारवाही, भूमिहीनलाई भुमि र हरवाचरवाको बैंक ऋण मिनाहा लगायतका मागहरु अघि सारेका छन् ।

मुक्त हरवाचरवाको न्यायिक पुनः स्थापना हाम्रो सरोकार, भूमि, शिक्षा, स्वास्थ्य, रोजगार र समाजिक सुरक्षा हाम्रो अधिकार नाराका साथ राजविराज र विरगन्जबाट शनिवार बिहान ९ बजे एकैसाथ पैदल यात्रा शुरु हुने पत्रकार सम्मेलनमा जानकारी गराइएको छ । 

यस्तै विरगन्जबाट निस्कने अधिकार यात्रामा पर्साका साथै रौतहट, बारा र सर्लाहीका हरवाचरवाका अगुवाहरूको सहभागिता रहने जनाइएको छ ।

जनकपुरमा भेला भएपछि आमसभा तथा प्रदेश सरकारलाई ज्ञापनपत्र र त्यस पश्चात् समीक्षा बैठक गरी थप दबावका लागि काठमाडौंसम्मको पैदल यात्राको कार्यक्रम तय गरिने योजना रहेको पत्रकार सम्मेलनमा जानकारी गराइएको छ ।