उपेन्द्र यादवको जितको खुशीयालीमा राजविराजमा दिप प्रज्वलन

राजविराज, १३ बैशाख । जनता समाजवादी पार्टी (जसपा) नेपालका अध्यक्ष उपेन्द्र यादव बारा २  प्रतिनिधिसभा सदस्यमा निर्वाचित भएको खुशियालीमा राजविराजमा बुधबार दिप प्रज्वलन गरिएको छ । राजविराजको गजेन्द्र चौकमा जसपाका नेताकार्यकर्ताहरूले गजेन्द्र नारायण सिंहको शालिकमा माल्यार्पण तथा मैनबत्ती बालेर खुशियाली मनाएका छन् । 

जसपा सप्तरीका अध्यक्ष केदार प्रसाद यादवको नेतृत्वमा आयोजित कार्यक्रममा जसपा केन्द्रिय कार्यकारिणी समिति सदस्य एवम् राष्ट्रिय सभा सदस्य पूर्व मन्त्री मृगेन्द्र सिंह यादव, जसपा प्रदेश साँसद किरण कुमारी साह, मधेश प्रदेशका पुर्व उपसभामुख उपमा देव, राजविराज नगरपालिकाका प्रमुख भिमराज यादव, मविव क्याम्पस राजविराजका सभापति रन्जित कुमार यादव लगायतका पार्टीका नेताकार्यकर्ताहरू तथा शुभचिन्तकहरूको  उल्लेखनीय उपस्थिति रहेको थियो ।

जसपा सप्तरीद्वारा आयोजित कार्यक्रममा नेपाल सदभावना पार्टीका संस्थापक अध्यक्ष गजेन्द्र नारायण सिंहको शालिकमा माल्यार्पण तथा मैनबत्ती बालेर नेता चौकमा पुगेर दीप प्रज्वलन गरि समापन गरिएको थियो ।

यस्तै सप्तरीको भारदह, अग्निसाईर कृष्णासवरन, कंचनरुप लगायतका विभिन्न मुख्य बजारहरुमा विजय जुलुस निकालिएको जसपाका स्थानीय नेताकार्यकर्ताले जानकारी दिए  । प्रतिनिधिसभा उपनिर्वाचनमा पाँच दलीय सत्तागठबन्धनको तर्फबाट बारा २ बाट साझा उम्मेदवार यादवले २८ हजार ४ सय १५ मत प्राप्त गरि प्रतिनिधि सभामा निर्वाचित भएका छन् ।